Read TAITA BIBLE – Biblia Ilagho Jiboie Kwa Wandu Wose ZABURI 28 Bible Online

ZABURI 28 - TAITA BIBLE – Biblia Ilagho Jiboie Kwa Wandu Wose bible

ZABURI 28

¹Nakuwanga oho ee BWANA; mlindiri wapo, kusakeninyamia. Kukaninyamia, nichafwanana na wandu wingirwagha kaburinyi.

²Sikira lwaka lwa kuvoya kwapo ngilomba wutesia; nawusira mikonu yapo, ngilangaya cha Hekalunyi yako ya Wueli.

³Kusakenitanya chiaimweri na wawiwi, awo wibonyagha wuwiwi; wandu wijagha malagho gha sere na wambao, ela ngolo rawo reko na kinyongo.

⁴Kuwilipe karakara na kazi rawo, kunughana na kuzama kwa mabonyo ghawo; kuwilipe karakara na seji wibonyere, kuwineke mafungu ghawo ghiwifwanagha.

⁵Kwa kukaia ndewitalagha iro kazi ra BWANA, angu ivo ubonyere; uchawikaba na kuwitotesha putu.

⁶BWANA ndekaso angu wasikira kuvoya kwapo.

⁷BWANA ni ndighi rapo na ngao yapo; nadamrumiria, nao wadanitesia. Ngolo yapo yaboilwa nandighi; nani nichamfunyira chawucha kwa kum'boria lumbo.

⁸BWANA wadawilindia wandu wake; uo ni ngome emkira Msaghulwa wake.

⁹Kira wandu wako ee BWANA, kujirasimie ifwa jako; kukaie mlisha wawo, kuwidukeghe matuku ghose.