Read TAITA BIBLE – Biblia Ilagho Jiboie Kwa Wandu Wose ZABURI 30 Bible Online

ZABURI 30 - TAITA BIBLE – Biblia Ilagho Jiboie Kwa Wandu Wose bible

ZABURI 30

¹Nakukasa ee BWANA kwa kunikira, hata ndekuwisighie wamaiza wapo wizume aighu yapo anduangi.

²Ee BWANA Mlungu wapo, nakukemia kwako kunitesie, na oho kukaniboisa.

³Ee BWANA kwaivuvue roho yapo isengie Andu kwa Wafu; kwanikirie nisengie kaburinyi.

⁴M'borienyi BWANA makaso inyo waeli wake, mumkumbuke na kujikuma irina jake ja wueli.

⁵Machu ghake ni gha ngelo ndini, ela wucha ghwake ghwadua matuku ghose. Kililo chadima kudwa kio kilazi, ela kuboilwa kwadacha nakesho.

⁶Niendakaia nicha nereghambieghe, “Na jingi sichaanyavurika.”

⁷Kwanimangishire sa mghondi m'baa kwa wucha ghwako ee BWANA; ela iji nerekusowieghe, ngaobua.

⁸Nerekukemieghe oho ee BWANA, ngalomba kwako kwa kuvoya:

⁹“Eko fwaidaki iji nafwa na kungirwa kaburinyi? Welee, wafu wadima kukukasa? Wadima kueresha wuloli ghwako?

¹⁰Sikira kuniwonie wughoma ee BWANA, kukaie mtesia wapo.”

¹¹Kwaghalue kulila kwapo kuwuye kuvina; kwainjire nguwo yapo ya igunia kukanirusha kuboilwa.

¹²Kwa huwo nichakukasa, sichaanyama kima anduangi. Nichakufunyira chawucha ee BWANA Mlungu wapo kwa kala na kala.