Read TAITA BIBLE – Biblia Ilagho Jiboie Kwa Wandu Wose ZABURI 33 Bible Online

ZABURI 33 - TAITA BIBLE – Biblia Ilagho Jiboie Kwa Wandu Wose bible

ZABURI 33

¹M'borienyi BWANA kwa kuboilwa inyo wahachi! Yawifwana wandu wecha wimkase.

²Mkasenyi BWANA kwa kinubi, m'borienyi makaso kwa kinubi cha chuzi ikumi.

³M'borienyi lumbo luwishi, kabenyi kinubi kwa wuya, mkibora na lwaka lubaa.

⁴Ilagho ja BWANA ni ja loli, na kazi rake rose radabonywa kwa wuloli.

⁵BWANA wadakunda hachi na wuloli, ndoenyi kwachua lukundo lwake lukatie.

⁶BWANA orebonyereghe mlungunyi kwa ilagho jake, na vose viko andenyi yaro orevibonyereghe kwa kughora koni.

⁷Oretumbanyireghe machi gha bahari kitungu kitungu, ukawika andu kumilie nganyenyi.

⁸Ndoenyi kose ndekumuobuo BWANA, wandu wose wurumwengunyi ndewimneke ishima.

⁹Iji oreghorieghe, wurumwengu ghorebonyekieghe; ukafunya momu, ghukamangishwa.

¹⁰BWANA wadarinona njama ra mbari ra wandu, na kuivurugha mipango yawo.

¹¹Njama ya BWANA yadadua kwa kala na kala, makusudi gha ngolo yake ghadua hata vivalwa na vivalwa.

¹²Yarasimilwa iyo mbari im'bonyere BWANA ukaie Mlungu wawo; wandu uwisaghue wikaie ifwa jake.

¹³BWANA wadazighana ndoenyi kufuma mlungunyi, na kuwiwona wadamu wose.

¹⁴Wadawizighana wandu wose wikaiagha ndoenyi; kufuma andu uko kidombo kifumbinyi chake cha nguma.

¹⁵Uo uriumbagha ngolo ra wandu wose, wamanya mabonyo ghawo ghose.

¹⁶Wusimi ghwa mzuri ndeghuredwagha ni ijeshi jake ibaa, hata ing'oni ndejikirwagha ni ndighi rake nyingi.

¹⁷Kusuwiria wusimi ghuredwagha ni farasi ya wuda ni duu; ikeduaka na ndighi rake nyingi, ndeidimagha kukira.

¹⁸Ola BWANA wadawizighana awo wimuobuagha, awo wilusuwiriagha lukundo lwake lukatie;

¹⁹upate kuwikira na kifwa, na kuwiwika moyo ngelo ya njala.

²⁰Isi dadamsuwiria BWANA, nuo mlindiri na mtesia odu.

²¹Hee, wadadiboia ngolonyi kodu, kwa kukaia dadajisuwiria irina jake ja wueli.

²²Lukundo lwako lukatie ndelukaie nesi ee BWANA, sa iji koni dawuyakusuwiria oho.