Read TAITA BIBLE – Biblia Ilagho Jiboie Kwa Wandu Wose ZABURI 34 Bible Online

ZABURI 34 - TAITA BIBLE – Biblia Ilagho Jiboie Kwa Wandu Wose bible

ZABURI 34

¹Nichamkasa BWANA ngelo rose; sichaasigha kumkasa tulituli.

²Nichakukasa andenyi ya BWANA, wandu wikorongelo wisikire na kuboilwa.

³Mkumenyi BWANA chiaimweri nani, ndedijikase irina jake chiaimweri.

⁴Neremlombieghe BWANA, ukanitumbulia; ukanikira na wowa ghwapo ghose.

⁵Mzighanenyi BWANA, nenyo mchaelwa ni mawushu; hata najingi ndechaafushwa waya.

⁶Uo mundu mkiwa orewangieghe, BWANA ukamsikira; ukamkira na wasi ghwake ghose.

⁷Malaika wa BWANA wadabonya kambi, kuwimara chia rose awo wimuobuagha; nao wadawikira.

⁸Timenyi mmbone kukaia BWANA ni mucha! Warasimilwa uo mundu ukusaghikagha kwake.

⁹Muobuonyi BWANA inyo waeli wake, angu awo wimuobuagha ndewisowagha kindo chingi anduangi.

¹⁰Wana wa shimba wasowagha wikaie njala, ela awo wimlolagha BWANA, ndewisowagha kindo chingi chiboie anduangi.

¹¹Choonyi wanake munisikirie, nichamfundisha seji imfwanagha kumuobua BWANA.

¹²Welee, kwakunde irangi, sena kuduo moyo matuku mengi na kuwona mecha?

¹³Basi kukulindie kusedede kiwiwi, hata kughora tee ingi.

¹⁴Kukutanye na wuwiwi, kubonye nicha, kulole sere na kuinugha na iseghe.

¹⁵BWANA wadawizighana wahachi, na kusikira kililo chawo.

¹⁶BWANA wadawitangala wawiwi, na kuwibonya wisekumbuko ndoenyi.

¹⁷Wahachi wikakema wikilola wutesia, BWANA wadasikira; nao wadawitesia kufuma kwa wasi ghwawo.

¹⁸BWANA wadakaia kaavui na wandu wifue ngolo, na kuwikira awo wisewadie isuwirio.

¹⁹Mundu wa hachi wadima kupatwa ni matiriro mengi, ela BWANA wadamkira nagho ghose.

²⁰BWANA wadamlindia hata ndekuwadie indi jingi jake, jichikagha anduangi.

²¹Wuwiwi ghuchawibwagha wawiwi; awo wizamilwagha ni wahachi, wichatanywa.

²²BWANA wadawikombua wadumiki wake; ndekuwadie ungi wa awo wimkimbiriagha uchaatanywa anduangi.