Read TAITA BIBLE – Biblia Ilagho Jiboie Kwa Wandu Wose ZABURI 35 Bible Online

ZABURI 35 - TAITA BIBLE – Biblia Ilagho Jiboie Kwa Wandu Wose bible

ZABURI 35

¹Simana na wandu wisimanagha nani ee BWANA, na awo wilwagha nani, kulo nawo.

²Wada ngao na kangao kuwuke kunitesie.

³Wusira ifumu ibaa na itini kulo na wandu wawuyaninugha; kunilaghire kukaia kuchanikira.

⁴Awo wilolagha kunibwagha, ndewifusho waya na kunonelwa ishima! Awo winibonyagha njama enibonya kiwiwi, ndewiwunjo nyuma kwa kukambirwa chongo.

⁵Ndewikaie sa makanda ghidukwagha ni mbeo, malaika wa BWANA ukiwiwinga noko.

⁶Chia yawo ndeiwuye kira na madende, malaika wa BWANA ukiwinugha.

⁷Wanideghie mdegho duu, wikanikotera kina cheniwada duu.

⁸Ndewichelo ni kunoneka wisemanyire, na mdegho wereghudeghieghe ghuwiwade weni; wipate kunoneka.

⁹Niko nichaboilwa andenyi ya BWANA, ngizuma andenyi ya kukia kwake.

¹⁰Nani nichaghora kwa ngolo yapo yose, “Nani uko sa oho ee BWANA? Kwadamkira mnyonge na uo umchumbie ndighi, na uo usene kindo chingi, kwadamkira na uo umsokagha.”

¹¹Washahidi wa tee wawuka aighu yapo; wianishitakia na malagho niseghiichi.

¹²Wanilipa mawiwi kwa mecha, nani nafwa ngolo putu.

¹³Ela iji awo werekoghe wakongo, nererwaeghe nguwo ya igunia kwa wasi; ngakughoghomesha nimoni kwa kufunga tumu, ngilomba Mlungu kwa kughoghomesha chongo chapo laghenyi kwapo.

¹⁴Nerelilieghe seji naawuyamlilia mghenyi wapo angu mwanidu wa womi; ngadamara-mara nighoghomekie sa mundu uliliagha mae aifonyi.

¹⁵Ela iji nerekuwieghe werenikwanyikieghe wikiboilwa; werekwanyikieghe kulwa nani; wandu nisewiichi wikadanizighiria wikiniziziria.

¹⁶Werenisekieghe sa wandu wiseko na kuobua kwa Mlungu, wikaja maghegho aighu yapo wikizamilwa.

¹⁷Kuzighanira huwu hata lii ee BWANA? Nivuvuo na mabonyo ghawo ghenona, kunikire na iri shimba.

¹⁸Niko nichakufunyira chawucha andenyi ya izungu ibaa; na kukukasa aghadi ya wandu wengi.

¹⁹Kusewisighe awo winisuagha duu wiboilo aighu yapo; na awo wizamilwagha ni ini duu, kusewisighe wikinikunyiria meso.

²⁰Ndewidedagha malagho gha sere; ela wadadunga tee ra kula mbari aighu ya wandu wikundagha sere isangenyi.

²¹Waniasamia memu yawo wikighamba, “Aa! Aa! Dawona diweni na meso ghedu.”

²²Oho kwawonie ee BWANA, kusenyame. Kusekaie kula nani ee BWANA.

²³Wuka kunidederie, ee Mlungu wapo na Bwana wapo.

²⁴Kunitale kukaia mloli ee BWANA Mlungu wapo kunughana na hachi yako; hata kusewisighe wamaiza wapo wiboilo aighu yapo.

²⁵Kusewisighe wikighamba, “Ola dapata seji dikundeghe, - dammeria.”

²⁶Awo wiboilwagha ni wasi ghwapo, ndewifusho waya nakuvurughika vongo. Awo wikuwusiragha weni aighu yapo, ndewifusho waya na kunonelwa ishima.

²⁷Awo wikundagha nisewoneke mkosa, ndewikeme kwa kuboilwa na kuzuma. Wighambeghe toe, “BWANA ni m'baa uo uboilwagha kuwona mdumiki wake ukikaia nicha.”

²⁸Niko nichaja malagho gha hachi yako, na gha makaso ghako dime dii.