Read TAITA BIBLE – Biblia Ilagho Jiboie Kwa Wandu Wose ZABURI 37 Bible Online

ZABURI 37 - TAITA BIBLE – Biblia Ilagho Jiboie Kwa Wandu Wose bible

ZABURI 37

¹Kusakesumbuka kwa wundu ghwa wandu wawiwi; kusewado ni iriso ja wandu wibonyagha makosa.

²Kafwani koni wichasoweka sa nyasi, na kunyaya sa miwalwa mmbishi.

³Msuwirie BWANA kubonye nicha, na oho kuchakaia nicha na kudua banana isangenyi.

⁴Boilwa andenyi ya BWANA, nao uchakukatishira bea ya ngolo yako.

⁵Kukufunye kwa BWANA; mrumirie, nao uchabonya.

⁶Uchaibonya hachi yako iwoneke sa mwengere, na loli yako ichawoneka sa mwengere ghwa dime ghadi.

⁷Kaia kima kummbesere BWANA; kuseje wasi aighu ya wandu iji wakawona nicha, ngelo wakabonya mipango ya wuwiwi.

⁸Tana na machu, kusighe lubio; kusekaie na wasi, ghwadareda wuwiwi.

⁹Wandu wawiwi wichainjwa, ela awo wimsuwiriagha BWANA, wichapata ifwa ja isanga.

¹⁰Kapindi katini, wawiwi wichasoweka; kukeduawilola, ndekuchaawiwona.

¹¹Ela wandu wa mboa, wichapata isanga; wichaboilwa na kupata kwa wungi.

¹²Mmbiwi wadabonya mpango ghom'bonya mhachi kiwiwi, na kuja maghegho aighu yake.

¹³Ela BWANA wadawiseka wawiwi, ukimanya kukaia kutua kwawo kwalighisa.

¹⁴Wandu wawiwi wadashoa chufu na kuruda ndana rawo, wipate kuwisera wakiwa na awo wisowagha, na kuwibwagha wandu wecha.

¹⁵Chufu rawo richawibwagha weni, na ndana rawo richachikanywa.

¹⁶Icho kitini mhachi uko nacho chaboie kuchumba mali ra wawiwi wengi.

¹⁷Kwa kukaia BWANA uchariinja ndighi ra wawiwi, ela uchawimaziria wahachi.

¹⁸BWANA wadawilindia awo wimsikiragha, na ifwa jawo jichadua kwa kala.

¹⁹Ndewichaapatwa ni wasi ngelo izamie; matuku gha njala, wichakaia na vindo vingi.

²⁰Ela wandu wawiwi wichatota. Wamaiza wa BWANA weeka sa mboi riomagha na kusoweka; wichasia na kulaghaya sa mosi.

²¹Mundu mmbiwi wadakopa, ela ndewunjagha; ela mhachi oko na ishima, nao wadaneka.

²²Awo wirasimilo ni BWANA, wichajipata isanga; ela awo uwiwasire njowe wichafungwa noko.

²³Mighendo ya mundu yadaghenjwa ni BWANA, nao wadammangisha ukiboilwa ni mighendo yake.

²⁴Ukeduakuwa, ndechaaghwa; kwa kukaia BWANA uchammazira kwa mkonu ghwake.

²⁵Nerekoghe mwana na idana naghosia; ela jingi simmbonie mhachi ungi usighilo ni Mlungu, angu wana wake wikilomba vindo.

²⁶Ngelo rose wadaneka kwa ishima na kukopesha, na wana wake, wawuya marasimio.

²⁷Sigha wuwiwi, kubonye nicha; na kivalwa chako chichadua isangenyi matuku ghose.

²⁸Angu BWANA wadakunda hachi, ndechaawisigha waeli wake. Uchadua ukiwilindia wahachi, ela kivalwa cha wawiwi chichainjwa.

²⁹Wahachi wichapata isanga, na kudua andenyi yaro matuku ghose.

³⁰Madedo gha mundu mucha ni gha hikima, nao wadatanya hachi.

³¹Sharia ya Mlungu wake yadakaia ngolonyi kwake, nao ndedimagha kulaghaya anduangi.

³²Mundu mmbiwi wadamlaliria mhachi, nao wadalola kum'bwagha.

³³Ela BWANA ndechaamsigha mhachi ungie mikonunyi kwa wamaiza wake, hata kumsigha utalo kukaia mkosi, iji washitakilwa.

³⁴Msuwirie BWANA, kukatishe malaghiro ghake. Uchakujosa kwa kukuneka isanga; na oho kuchawona wawiwi wikifunywa noko.

³⁵Nammbonie mundu mmbiwi, mkinyanya; uko ighu sa msida ghwa Lebanoni.

³⁶Ela iji naida aho sena, seremmbonieghe; ngamlola, ela sicheemmbona.

³⁷Mzighane mundu mucha, kumlawuo mhachi; mundu wa sere wawadie kivalwa.

³⁸Ela wakaung'a wichatoteshwa putu; kivalwa chawo chichainjwa.

³⁹Kukia kwa wahachi kwadafuma kwa BWANA, nao wadawilindia ngelo ya wasi.

⁴⁰BWANA wadawitesia na kuwivuvua, wadawivuvua kufuma kwa wandu wawiwi na kuwikira, angu wikusaghikagha kwake.