Read TAITA BIBLE – Biblia Ilagho Jiboie Kwa Wandu Wose ZABURI 38 Bible Online

ZABURI 38 - TAITA BIBLE – Biblia Ilagho Jiboie Kwa Wandu Wose bible

ZABURI 38

¹Ee BWANA kusakenidokia kwa machu ghako, hata kusakenineka adhabu kwa lubio lwako.

²Kwanishoghonua na mawanu ghako, na kunikaba na ndighi.

³Nasowa wubanana kwa wundu ghwa machu ghako. Maindi ghapo ghateweleka, kwa wundu ghwa kaung'a yapo.

⁴Kaung'a rapo ranilemeria nandighi, sa msigo ghusedukikagha.

⁵Vonda vapo varurugha vianuka, kwa wundu ghwa wukelu ghwapo.

⁶Nakomeka na kuloloma nandighi, nadasindalila dii.

⁷Nawadwa ni homa, hata siko banana anduangi.

⁸Nasia putu na ngachachanika; naawuyaruma ngiwawa ni ngolo.

⁹BWANA, kwaichi ghose niko na bea nagho; kwawuyawona seji nisoriagha ngolo.

¹⁰Ngolo ianitika-tika; ndighi rapo rasia, na meso ghapo ghiasera kira.

¹¹Waghenyi wapo na wangara wapo ndewiwuenisoghodera, kwa wundu ghwa vonda vapo; wamzedu wakaia kula nani.

¹²Wandu wilolagha kunibwagha wanideghia midegho; awo wilolagha kunishoghonua waja malagho gheninona; nawo wasinda wikinibonyera mipango izamie.

¹³Ela ini neeka sa mundu ufue madu, usesikiragha; neeka sa kituri usededagha.

¹⁴Hee, neeka sa mundu usesikiragha, usedimagha kutumbulia.

¹⁵Ela naawuyakuweseria oho ee BWANA; ni oho kutumbuliagha ee BWANA Mlungu wapo.

¹⁶Nawialomba tu, “Kusesighe awo wikukasagha aighu yapo wiboilo iji naghwa.”

¹⁷Nalighisa kughwa, nani naduagha ngiwawa.

¹⁸Narumiria makosa ghapo; nawawa ni kaung'a yapo.

¹⁹Wamaiza wapo wawadie ndighi; awo wizamilwagha ni ini duu ni wengi.

²⁰Awo wawuyanilipia mawiwi kwa mecha; wakaia wamaiza wapo angu nawuyabonya nicha.

²¹Kusakenisigha ee BWANA; kusakaie kula nani, ee Mlungu wapo.

²²Shashira kunitesia ee BWANA, Mkiri wapo.