Read TAITA BIBLE – Biblia Ilagho Jiboie Kwa Wandu Wose ZABURI 40 Bible Online

ZABURI 40 - TAITA BIBLE – Biblia Ilagho Jiboie Kwa Wandu Wose bible

ZABURI 40

¹Neremmbesereghe BWANA kwa irumaghio unitesie, ukanideghia kudu kwake na kusikira kililo chapo.

²Ukanijosa kufuma kinenyi cha kunoneka mazozonyi; ukaniwika kimusi aighu ya igho, andu kwa banana.

³Ukanifundisha kubora lumbo luwishi, lumbo lomkasa Mlungu odu. Wandu wengi wichawona na kuobua, nawo wichamrumiria BWANA.

⁴Warasimilwa uo mundu umrumiriagha BWANA, uo useighalukiagha milimu angu kunugha wandu witasagha milungu ya tee.

⁵Mabonyo ghako gha mashiniko, na mipango yako cha kodu ni mingi na ndighi ee BWANA Mlungu odu, ndekuwadie ungi udimagha kufwananishwa na oho! Ngera nadaghieresha na kughora malagho gharo, ndaghatalikagha.

⁶Oho ndekuna haja ya vizongona na mafunyo ghangi; ela kwaniboisire mumbi. Ndekukunde vizongona vekora hata vizongona kwa wundu ghwa kaung'a anduangi.

⁷Niko ngaghamba, “Ola nameria kucha sa iji koni malagho ghapo ghiandikilo andenyi ya chuo.

⁸Naawuyaboilwa ni kubonya lukundo lwako ee Mlungu wapo.” Sharia yako eko andenyi ngolonyi kwapo.

⁹Nachilie malagho mecha gha kukia andenyi ya izungu ibaa ja wandu; sisighie kughighora sa iji koni kumanyagha ee BWANA.

¹⁰Ini sivisire ilagho jingi ja wutesia ghwa kukia kwako ngolonyi kwapo; naghorie malagho gha wuloli ghwako na gha kukia kwako. Sivisire ilagho jingi ja lukundo lwako lukatie na wuloli ghwako andenyi ya ijo izungu ibaa ja wandu.

¹¹Kusesighe kunifuya wughoma ee BWANA, kunilindie matuku ghose kwa lukundo lwako lukatie na wuloli ghwako.

¹²Namarwa chia rose ni wasi mungi ghusetalikagha; kaung'a rapo ranichumba ndighi, sidimagha kuwona; rakaia nyingi kuchumba mtalo ghwa iridia japo, nani nafwa ngolo.

¹³Rumiria kunikira ee BWANA! Ee BWANA, shashira kunitesie!

¹⁴Awo wikundagha kunibwagha, ndewifusho waya na kukambirwa chongo; na awo wiboilwagha ni kunoneka kwapo, ndewiwunjo nyuma na kunonelwa ishima.

¹⁵Awo winizomagha, “Hi, hi!” ndewishinike kwa wundu ghwa kufushwa waya kwawo.

¹⁶Awo wose wikulolagha, ndewiboilo na kuzuma andenyi kwako; na awo wikundagha kukia kwako, ndewighore tulituli “BWANA ndekaso.”

¹⁷Ini ne mkiwa usowagha, ela oho BWANA kwadaniririkanya. Oho ko mtesia wapo na mkiri wapo, kusemuke kunitesia ee Mlungu wapo.