Read TAITA BIBLE – Biblia Ilagho Jiboie Kwa Wandu Wose ZABURI 44 Bible Online

ZABURI 44 - TAITA BIBLE – Biblia Ilagho Jiboie Kwa Wandu Wose bible

ZABURI 44

¹Dasikire na madu ghedu ee Mlungu, daghorelo ni weke aba, seji kubonyere ngelo rawo agho matuku ghawo gha kala:

²Korewingieghe mbari ra wandu kumoni, kukawiwika weke aba aho; korewitiririeghe awo wandu, kukawibonya weke aba wiwone mecha.

³Weke aba ndewerewadieghe isanga kwa lufu lwawo loni, hata ndeweresimieghe kwa ndighi rawo; ela ni kwa ndighi rako, na kudima kwako, kukiwonyera angu kokwanye nawo, angu korewikundieghe.

⁴Oho ko Mzuri wapo na Mlungu wapo, uo urediagha kivalwa cha Jakobo wusimi.

⁵Dichawisima wamaiza wedu kwa ndighi rako, na kwa irina jako dichawiwadia-wadia awo wilwagha nesi.

⁶Siwueirumiria ndana yapo, hata lufu lwapo ndeludimagha kunikira anduangi.

⁷Ela oho kwadikirie na wamaiza wedu, na kuwisima awo wizamilwagha ni isi.

⁸Dadakukasa na oho Mlungu tuli tuli; dichakufunyira chawucha kwa kala na kala.

⁹Ela idana kwadileghie, kukadibonya disimo; hata ndekughendanye na majeshi ghedu anduangi.

¹⁰Kwadibonyere dikawikimbia wamaiza, nawo wikawada mali redu.

¹¹Kwadifunyire dibwagho sa ng'ondi; kukadisaghisa aghadi ya mbari ra wandu.

¹²Kwawiuzire wandu wako kwa ighuri itini, hata ndekupatire fwaida ingi kwa wundu ghwawo.

¹³Kwadibonyere dikaie wesekwa ni wambedu, kudemwa sare na kumenywa ni awo wiko mbai-mbai yedu.

¹⁴Kwadibonyere dikawuya wandu wetanilwa aghadi ya mbari zima; nawo wadisughusira vongo kwa lumenyo.

¹⁵Nadasinda ngimenywa dii, na kuwona waya m'baa,

¹⁶kwa malagho gha wandu widemagha sare na kusholia; ngimmbona m'maiza na mluya lugho.

¹⁷Dapatiro ni maza iri rose, hata ngera ndedikuliwie angu kuchikanya ilaghano jako.

¹⁸Isi ndedikusighie, hata ndedileghie kunugha malaghiro ghako.

¹⁹Ela sena kwadisighanye na nyamandu ra isakenyi, kukadisigha andenyi ya kira kibaa.

²⁰Ngera dedekuliwa oho Mlungu odu, angu kutasa mlungu ghwa kighenyi,

²¹ndekoremanyagha e kuichi ngasu rose ra ngolo ee Mlungu?

²²Ela sena daawuyabwaghwa kwa wundu ghwako dime dii, na kutalwa kukaia sa ng'ondi ra kubwaghwa.

²³Wuka ee BWANA, kwaki kulalagha? Wuka kusakedilegha putu.

²⁴Kwaki kukuvisagha? Kwaki kuliwagha makorongo na matiriro ghedu?

²⁵Daghwa andoenyi, na kulala terinyi dasimwa.

²⁶Wuka kuche kuditesie; Dikire kwa wundu ghwa lukundo lwako lukatie.