Read TAITA BIBLE – Biblia Ilagho Jiboie Kwa Wandu Wose ZABURI 45 Bible Online

ZABURI 45 - TAITA BIBLE – Biblia Ilagho Jiboie Kwa Wandu Wose bible

ZABURI 45

¹Nachulwa ni malagho mecha ghemdunga mzuri lumbo; lumi lwapo lwakaia sa kalamu ya mwandiki uko na wuya.

²Oho kwaghokie kuchumba wandu wose; kwanekelo kudeda malagho gha mvono, kwa kukaia Mlungu wakurasimie matuku ghose.

³Rwaa lufu lwako kiwonunyi ee mundu kuwadie ndighi; oho koko wa wubaa na nguma ra kiwuzuri.

⁴Joka na wubaa ghwako, kusime wamaiza wako; kudederie loli na hachi; kuwonyere wusimi m'baa kwa ndighi rako.

⁵Mawanu ghako ghakalie; ghalasa ngolo ra wamaiza wako; mbari ra wandu raghwa maghunyi kwako.

⁶Kifumbi chako cha nguma ni cha Mlungu, chiadua kwa kala na kala; kwawibonyere wandu wako nguma kwa hachi;

⁷kwaikunda hachi na kuzamilwa ni kiwiwi. Kwa huwo Mlungu, Mlungu wako wakushingie mavuda, na kukuneka kuboilwa kubaa kuchumba wambenyu.

⁸Marwao ghako ghanuka marumba gha manemane, uudi na mdalasini. Kwadaboilwa ni chwaka ra zeze, rikabwagha andenyi ya ngome ra wazuri; riaghilo na mbembe ra chovu.

⁹Aghadi ya waka wa ishima wiko mezenyi kwako, wamu wawo ni wai wa wazuri; malikia oko kimusi chia ya mkonu ghwa kiwomi ghwa kifumbi chako cha nguma, urwae dhahabu ielie nandighi.

¹⁰Degha kudu kusikire ee mwai kulowolwagha ni mzuri: Liwa wandu wako, na nyumba ya ndeyo.

¹¹Mzuri wawuyaghokelwa ni oho. Kumneke ishima, angu ni bwana wako.

¹²Wandu wa Tiro wichakuredia manosi, wazuri wa mali wichalola kurumirilwa ni oho.

¹³Mwai wa mzuri oko chumbenyi kwake upambilo nicha, marwao ghake gheelukwa na uzi wa dhahabu;

¹⁴waghenjwa kwa mzuri urushiro marwao gha rangi nyingi; ukwanye na wawuchi wake, wai wielie; wimfumiragha kwake.

¹⁵Waghenjwa kwa kuboilwa na kuzuma, nawo wangia ngomenyi kwa mzuri.

¹⁶Wana wako wichawadwa wulalo ghwa weke ndeyo; kuchawibonya wikaie wabaa isangenyi kose.

¹⁷Nichabonya irina jako jikumbukoghe vivalwa vose; kwa huwo wandu wichakukasa kwa kala na kala.