Read TAITA BIBLE – Biblia Ilagho Jiboie Kwa Wandu Wose ZABURI 48 Bible Online

ZABURI 48 - TAITA BIBLE – Biblia Ilagho Jiboie Kwa Wandu Wose bible

ZABURI 48

¹BWANA ni m'baa, wafwana ukaso nandighi mzinyi kwa Mlungu odu, aighu ya mghondi ghwake ghwa wueli.

²Ugho mghondi ghwa Sioni, ghuko cha kaskazinyi, ghwawukie ighu; ghwaghokie, nagho ni muzi ghwa Mzuri m'baa, ghuredagha kuboilwa ndoenyi kose.

³Mlungu wakuwonyera moni kukaia mlindiri wa loli andenyi ya ngome ra ugho muzi.

⁴Wazuri werekwanyikieghe chiaimweri, wikachanya wose.

⁵Wiendaghuwona ugho muzi woruwu wikashinika; wikakambwa ni chongo, wikakimbia.

⁶Wikawadwa ni kusughusika aho, wikapatwa ni luwawo sa lwa muka ukumbagha lufu lova.

⁷Kukawitotesha sa meli ra Tarshishi,[2] ritoteshwagha ni mbeo enona ya mashariki.

⁸Seji disikire, niko koni diwonie andenyi ya muzi ghwa BWANA wa majeshi, ugho muzi ghwa Mlungu odu, BWANA ughumangishire kwa kala na kala.

⁹Dadaririkanya malagho gha lukundo lwako lukatie ee Mlungu, iji diko andenyi ya Hekalu yako.

¹⁰Kwawuyakaswa kula andu ee Mlungu, na sare yako yaera ndoenyi kose; oho kwadabonya nguma kwa hachi.

¹¹Wandu wa Sioni waboilwa, mizi ya Juda yachulwa ni iseko kwa wundu ghwa kutanya kwako.

¹²Selenyi mughumare muzi ghwa Sioni; talenyi minara yaro.

¹³Lawuonyi wurigha na ngome raro nicha; mpate kuchighoria kivalwa chichagha:

¹⁴“Uhu Mlungu, ni Mlungu odu kwa kala na kala. Uchakaia ukidighenja kari kose.”