Read TAITA BIBLE – Biblia Ilagho Jiboie Kwa Wandu Wose ZABURI 49 Bible Online

ZABURI 49 - TAITA BIBLE – Biblia Ilagho Jiboie Kwa Wandu Wose bible

ZABURI 49

¹Sikirenyi agha inyo wandu wose! Deghenyi madu mmbose mkaiagha wurumwengunyi,

²mmbose wandu wa ndonyi, na wa ighu; wiwadie mali, na wakiwa.

³Nichadeda malagho ghifumagha ngolonyi kwapo, gha hikima, ghieliagha.

⁴Nichadegha kudu, nisikire ikatanisho; nichatambua ndawi rapo ngibora kwa kinubi.

⁵Kwaki niobuagha ngelo napatwa ni wasi; iji namarwa ni wakorongi wapo,

⁶awo wikusaghikagha na mali rawo, na kukukasa na wungi ghwa mali rawo?

⁷Loli mndungi ndedimagha kukukombua moni, angu kumneka Mlungu ighuri kwa wundu ghwa irangi jake.

⁸Wukomboli ghwa irangi jake ghoko na zoghori mbaa, jingi iselipikagha;

⁹hata udime kukaia moyo kwa kala na kala, jingi usengie kaburinyi.

¹⁰Kula mundu wawuyawona kukaia hata wandu wa hikima wafwagha; wakelu, na wandu wisena akili wadatota wokoni, na kuwisighia wandu wazima mali rawo.

¹¹Kaburi rawo rawuya nyumba rawo ra kala na kala, na andu kwawo kokaia vivalwa vose; hata ngera werekoghe na masanga ghawo weni.

¹²Mdamu ndedimagha kudua na wubaa ghwake, oofwanana na nyamandu ritotagha.

¹³Huwo niko ikaiagha kwa wandu wikurumirie weni; na awo wirumirianagha nawo kwa madedo ghawo.

¹⁴Wawikilo kufwa karakara na ng'ondi; kifwa chichakaia mlisha wawo. Wandu wa hachi wichawibonyera nguma kafwani, mimbi yawo ichawoa, na andu kwa wafu kuchakaia muzi ghwawo.

¹⁵Ela Mlungu uchanikombua kufuma kwa ndighi ra kifwa, angu uchanidwa cha kwake.

¹⁶Kusakenyavurika mndungi ukawuya mzuri wa mali, na mecha gha nyumba yake kuchurikia.

¹⁷Angu iji wafwa, ndedwagha kindo chingi, hata mali rake nderichaamnugha kaburinyi anduangi.

¹⁸Hata ngera orekuwonieghe moni kukaia mrasimilwa ingelo uko moyo, na kukumwa kwa agho wawuyabonya,

¹⁹uchanugha weke wawae kifonyi, awo wisewuyaawona mwengere jingi.

²⁰Mdamu ndedimagha kudua na wubaa ghwake, oofwanana na nyamandu ritotagha.