Read TAITA BIBLE – Biblia Ilagho Jiboie Kwa Wandu Wose ZABURI 50 Bible Online

ZABURI 50 - TAITA BIBLE – Biblia Ilagho Jiboie Kwa Wandu Wose bible

ZABURI 50

¹BWANA, Mlungu, Uwadie-Ndighi-Rose, wadeda ukiwanga ndoenyi kufuma mashariki hata magharibi.

²Mlungu wang'ala-ng'ala kufuma Sioni, ugho muzi ghughokie putu.

³Mlungu odu uacha, ela ndechagha kima; modo ghulunguragha ghoko imbiri kwake, na kiremba kibaa chammara mbai mbai.

⁴Wawanga mlungunyi na ndoenyi, rishuhudie ukitanya wandu wake.

⁵Waghamba, “Nikwanyienyi wandu wapo waloli awo wibonyere ilaghano nani kwa kizongona.”

⁶Mlungunyi kwaeresha kukaia Mlungu ni mhachi nao moni nuo mtanyi.

⁷“Sikirenyi nighore ee wandu wapo, nichashuhudia aighu yako ee Israeli; sikirenyi nighore; ini ne Mlungu, Mlungu wako.

⁸Sikukemiagha kwa wundu ghwa vizongona vako, na vizongona vako vekora kuvifunyagha imbiri kwapo tulituli.

⁹Sina haja na njau ingi kufuma kwako, angu fwandi ingi kufuma chaghenyi kwako.

¹⁰Kwa kukaia kula nyamandu ya isakenyi ni yapo; na mfugho rose riko aighu ya maelfu gha mighondi.

¹¹Nyonyi rose ra mbeonyi nariichi, na ivo vose vighendagha amlambenyi ni vapo.

¹²“Ngera nedezughwa, sakughoriagha; angu wurumwengu na vose viko andenyi yaro ni vapo.

¹³Kwani nadaja nyama ya ng'ombe, angu kunywa bagha ya mburi?

¹⁴Mfunyire Mlungu vizongona va chawucha, mneke Uo-Uko-Aighu-Nandighi vindo kulaghirie.

¹⁵Kuniwange ituku kwapatwa ni wasi, nani nichakukira na oho kuchanikasa.”

¹⁶Ela Mlungu waghamba huwu kwa mundu mmbiwi: “Koko na hachiki eghora sharia rapo, angu kughora malagho gha ilaghano japo?

¹⁷Oho kwadazamilwa ni kufundishwa, na kulegha malagho ghapo.

¹⁸Kukawona kitoi, kwadarumiriana nacho; na oho kwadawadana na walaki.

¹⁹“Kwadadeda kiwiwi ngelo rose, na kudunga tee.

²⁰Kwadamdeda mwanyinyu, na kumdungia mwanyinyu wa mayo tee.

²¹Kwabonyere agha ghose, nani nganyama kima; kukadaghesha wei deefwanana. Ela idana nichakukemia na kukughoria makosa ghako worinyi.

²²“Zighanenyi ijo ilagho inyo muniliwagha, nisechemrashua hata msowe mndungi omkira.

²³Mundu unifunyiragha vizongona va chawucha, wadanineka ishima, na uo uboisagha mighendo yake, nichammbonyera kukia kwapo.”