Read TAITA BIBLE – Biblia Ilagho Jiboie Kwa Wandu Wose ZABURI 51 Bible Online

ZABURI 51 - TAITA BIBLE – Biblia Ilagho Jiboie Kwa Wandu Wose bible

ZABURI 51

¹Kunifuye wughoma ee Mlungu, kunughana na lukundo lwako lukatie; kuniinjire makosa ghapo, kunughana na wungi ghwa wughoma ghwako.

²Kunioghoshe kiwiwi chapo putu, kunieleshe kaung'a yapo.

³Naghimanya makosa ghapo, na kaung'a yapo eko worinyi kwapo ngelo rose.

⁴Ni oho kumoni, ee, ni oho kumoni kuekeri nikubonyere kaung'a; nabonyere ijo jiko iwiwi imbiri kwako. Kwa huwo, seji kutanyire aighu yapo ni hachi, na kutanya kwako ni kwa loli.

⁵Ini ne mkaung'a kufuma kuvalwa kwapo; ne mkaung'a kufuma naamwa kifunyi kwa mao.

⁶Oho kwadakunda loli ya kondenyi; kunifundishe hikima ya ngolonyi.

⁷Kunieleshe kwa hisopu,[3] nani nichaela, nioghoshe, nani nichawuya wa chokwa kuchumba theluji.

⁸Kunibonye niboilo na kuseka; andu korekuchikanyireghe, kuwurilo ni kuboilwa.

⁹Kusakerizighana kaung'a rapo; kughiaghie mawiwi ghapo ghose.

¹⁰Kuniumbie ngolo ielie andenyi kwapo ee Mlungu; kuningire roho mbishi ya loli.

¹¹Kusakenida kula na oho, hata Roho wako mweli kusakemwinja kwapo.

¹²Kuniwunjire kuboilwa kwa kukia kwako, kunimazire kwa roho ekunda kusikira.

¹³Niko nichaawifundisha wakosi chia rako, na wakaung'a wichakuwuria oho.

¹⁴Kunikire na kaung'a ebwagha ee Mlungu, oho Mlungu Mkiri wapo; nani nichabora na ndighi malagho gha kukia kwako.

¹⁵Kunitambuo memu yapo ee BWANA, nani nichakukasa.

¹⁶Ndekuboilwagha ni vizongona, kumangu nakufunyira; ndekuboilwagha ni vizongona vekora anduangi.

¹⁷Vizongona virumirilwagha ni Mlungu, ni roho ikuserie; ndekuchaaimenya ngolo ikuserie, iheagha ee Mlungu.

¹⁸Kukunde kuibonyera Sioni nicha ee Mlungu; kughiaghe sena mawurigha gha Jerusalemu.

¹⁹Niko kuchaaboilwa ni vizongona va hachi; vizongona vekora, na vizongona vekora vose; niko njau richaafunywa madhabahunyi kwako.