Read TAITA BIBLE – Biblia Ilagho Jiboie Kwa Wandu Wose ZABURI 56 Bible Online

ZABURI 56 - TAITA BIBLE – Biblia Ilagho Jiboie Kwa Wandu Wose bible

ZABURI 56

¹Kuniwonie wughoma ee Mlungu, angu wandu waawuyaningiria; wamaiza waawuyanikoronga ngelo rose.

²Wamaiza wapo wadasinda ningiria dii; awo wilwagha nani wikikukasa ni wengi.

³Ngaobua, nichakurumiria oho.

⁴Neemrumiria Mlungu, sina wowa; naawuyamkasa kwa wundu ghwa ilagho jake. Mdamu wadima kunibonya wada?

⁵Wadasindaghalua malagho ghapo dii; maghesho ghawo ghose ni ghenibonya kiwiwi.

⁶Wanilaliria chiaimweri, wikizighanira seji nibonyagha, na wikikunda kunibwagha.

⁷Kusakewisigha wifufunuke kwa wundu ghwa wuwiwi ghwawo; kuwikabe kwa machu ghako ee Mlungu.

⁸Oho kwaichi kusumbuka kwapo; kwawikie mtalo ghwa mbori rapo. Nechi raandikilo chuonyi kwako?

⁹Ituku nilombagha wutesia, wamaiza wapo wichawunjwa nanyuma; naichi huwo, angu Mlungu uko luwaru lwapo.

¹⁰Mlungu, uo BWANA nikasagha ilagho jake,

¹¹uo Mlungu, nuo nimrumiriagha kuseko na wowa. Mdamu wadima kunibonya wada?

¹²Nichakatisha maghemi nibonyere kwako ee Mlungu; nichakufunyira vizongona va chawucha.

¹³Kwa kukaia oho kwanikirie na kifwa, na kunilindia nisegho; nipate kughenda imbiri ya Mlungu, andenyi ya mwengere ghwa irangi.