Read TAITA BIBLE – Biblia Ilagho Jiboie Kwa Wandu Wose ZABURI 59 Bible Online

ZABURI 59 - TAITA BIBLE – Biblia Ilagho Jiboie Kwa Wandu Wose bible

ZABURI 59

¹Kunikire na wamaiza wapo ee Mlungu wapo; kunilindie na awo wikunde kulwa nani.

²Kunikire na wandu wawiwi, kunikire na wabwaghi.

³Hawo waawuyanilaliria wipate kunibwagha, wandu wibirie wakukwanya chiaimweri aighu yapo. Ini siwadie ikosa, hata kaung'a ingi ee BWANA.

⁴Sibonyere ikosa jingi, ela weekunda kuningiria. Wuka kuwone, kunitesie.

⁵Ee BWANA Mlungu wa majeshi, Mlungu wa Israeli, wuka kurikabe mbari rose ra wandu; kusesighe ungi wa awo wawuyabonya njama ra wuwiwi kwa mikalo.

⁶Kula ituku wadawuya nakenyi wikiboka sa koshi na kumara-mara a mzinyi.

⁷Sikira seji widukanagha, na kuzaruma, chumi rawo reeka sa chufu memunyi kwawo; ela sena wiaghesha mndungi ndewuewisikira.

⁸Ela oho BWANA kwadawiseka, na kudema mbari rose ra wandu sare.

⁹Ee Mlungu, kuko Ndighi rapo, ko ngome yapo; nichakuboria makaso.

¹⁰Mlungu wapo kwa kunikunda na lukundo lukatie, uchanikiria; nao uchanibonya niwizighane wamaiza wapo wasimwa.

¹¹Kusakewibwagha, wandu wapo wicheliwa; Wineke kumara-mara kwa ndighi rako, na kuwisima, ee BWANA mlindiri odu.

¹²Kwa wundu ghwa madedo ghawo gha kaung'a, ndewiwado andenyi ya kukukasa kwawo. Kwa wundu ghwa kuewia na iro tee wawuyaghora,

¹³kuwitoteshe kwa machu ghako; kuwimerie putu. Niko wandu wichamanya kukaia, Mlungu wabonyeragha Israeli nguma, na ndoenyi kose.

¹⁴Kula ituku wadawuya nakenyi, wikiboka sa koshi, na kumara-mara a mzinyi.

¹⁵Wadamara-mara sa koshi wikilola vindo, na kuboka iji walemwa ni kughuda.

¹⁶Ela ini nichabora malagho gha ndighi rako, kula nakesho, nichaghibora agho gha lukundo lwako lukatie. Oho korekoghe ngome na andu kwapo kokimbiria ngelo ya wasi.

¹⁷Nichakuboria makaso ee Ndighi rapo. Ee Mlungu, oho ko ngome yapo, Mlungu uniwonyeragha lukundo lwake lukatie.