Read TAITA BIBLE – Biblia Ilagho Jiboie Kwa Wandu Wose ZABURI 62 Bible Online

ZABURI 62 - TAITA BIBLE – Biblia Ilagho Jiboie Kwa Wandu Wose bible

ZABURI 62

¹Nadammbesera Mlungu kima; kukia kwapo kwadafuma kwake koni.

²Nuo uekeri uko mlindiri na kukia kwapo, nao ni ngome yapo; sichaanyavurika anduangi.

³Mulwa na mundu mkimtang'aria hata lii? Nao ooka sa wurigha ghughomekie, na luvuna luchikagha?

⁴Mookunda tu kumuinjira ishima jake. Mwadaboilwa ni kughora tee, Mwadarasimia kwa memu yenyu, ela kondenyi mwadawasira njowe.

⁵Nadammbesera Mlungu kima, angu isuwirio japo jeeka kwake.

⁶Nuo uekeri uko mlindiri na Mkiri wapo nao ni ngome yapo; sichaanyavurika anduangi.

⁷Kukia kwapo na ishima japo vadafuma kwa Mlungu; uo ni mlindiri wapo uko na ndighi, nuo andu kwapo kokimbiria.

⁸Rumirienyi Mlungu ngelo rose ee wandu, mumghorie wasi ghonyu ghwa ngolonyi; Mlungu nuo andu kodu kokimbiria.

⁹Wandu wa ndonyi ni sa miruke cheni, na wandu wa ighu si kilambo chingi; wikapimwa, wiawuka nokoighu; waangue kuchumba miruke.

¹⁰Mserumirie chia etumia ndighi, angu kukaia na isuwirio kwa chia esoka; mali rikachurikia msakerisuwiria.

¹¹Mlungu wadedie indo jimu, ngawuya ngasikira indo ja kawi; kukaia, ndighi ni rake,

¹²na lukundo lukatie. Oho BWANA kwadamlipa mundu karakara na kazi yake.