Read TAITA BIBLE – Biblia Ilagho Jiboie Kwa Wandu Wose ZABURI 64 Bible Online

ZABURI 64 - TAITA BIBLE – Biblia Ilagho Jiboie Kwa Wandu Wose bible

ZABURI 64

¹Sikira malalamiko ghapo ee Mlungu, kunilindie na kuturusa kwa uja m'maiza.

²Kunilindie na njama ra wawiwi, na izungu ja wandu wibonyagha wuwiwi.

³Wakalisha chumi rawo sa chufu, na kuwaria madedo ghawo ghibirie sa mawanu.

⁴Walaliria na kulasa mundu usewadie ikosa, wikimlasa shwa kuseko na wowa.

⁵Wakumbana ngolo weni kwa weni, kwa mipango yawo ya wuwiwi; waja malagho seji widimagha kudegha midegho yawo wikighamba, “Mndungi ndeiwonagha.

⁶Nani udimagha kumanya wuwiwi ghodu? Damerie kuririkanya na kukatisha njama redu ra mikalo.” Angu mdamu ooka ukuvisire ndenyi.

⁷Ela Mlungu uchawilasa na iwanu jake, nawo wichashoghonoka ghafla.

⁸Uchawitotesha kwa wundu ghwa madedo ghawo; wandu wose wichaawiwona, wichasughusa vongo vawo.

⁹Wandu wose wichaobua; wichaja malagho gha kazi ra Mlungu, na kuririkanya agho ubonyere kwa wundenyi.

¹⁰Wandu wa hachi ndewimzumie BWANA, na kumkimbiria; wandu wecha wose ndewikase.