Read TAITA BIBLE – Biblia Ilagho Jiboie Kwa Wandu Wose ZABURI 65 Bible Online

ZABURI 65 - TAITA BIBLE – Biblia Ilagho Jiboie Kwa Wandu Wose bible

ZABURI 65

¹Ni hachi dikukase aho Sioni ee Mlungu, aho dichakatisha maghemi ghedu kwako.

²Oho kusikiragha malombi, wandu wose wichakuchea,

³kwa wundu ghwa kaung'a. Iji deresimiloghe mawiwi ghedu, koredifuyeghe wughoma.

⁴Warasimilwa wandu kuwisaghuagha na kuwireda kaavui wikaieghe wazenyi kwako. Dichakatwa ni vilambo vicha va nyumbenyi kwako, iyo Hekalu yako ya wueli.

⁵Oho kwadaditumbulia kwa kudineka wusimi kwa chia ya mabonyo ghako gheobosha, ee Mlungu wa kukia kodu; oho kuko isuwirio ja ndoenyi kose, na andu kuko kula na ndighi kwa bahari.

⁶Oho kwaimangishire mighondi kwa ndighi rako, kukifunga na wudimi sa mshipi. Kwaiwikie mighondi kwa ndighi rako.

⁷Kwadanyamira mirurumo ya bahari, na mirurumo ya mivo-mivo yaro, na ndoghoi ra wandu;

⁸wandu wikaiagha andu kuko kula na ndighi kwa ndoenyi, wadaoboshwa ni mabonyo ghako. Kwadawibonya wikeme kwa kuboilwa ii chia na ii chia ndoenyi kose.

⁹Kwadaizighana ndoe na kuinyeshera vua, kukiiwurusha nandighi; kwaichura meda machi, na huwo niko kubonyere, na kuwipatira wandu viro.

¹⁰Kwadainyeshera matuta gharo vua kwa wungi, na kuderesha matuta gharo; kwainyeresha mishushure, na kuirasimia miwalwa yaro.

¹¹Kwaghubonya ghukae mwaka ghwa mvono, na magare ghako ghichuo viro na kudika-dika.

¹²Nyasi ra kireti rachua mami; mighondi yaghoka nandighi.

¹³Milamba yachua ng'ondi, vololo rachua viro; vilambo vose vawona nicha na kuboilwa.