Read TAITA BIBLE – Biblia Ilagho Jiboie Kwa Wandu Wose ZABURI 66 Bible Online

ZABURI 66 - TAITA BIBLE – Biblia Ilagho Jiboie Kwa Wandu Wose bible

ZABURI 66

¹Mzumienyi Mlungu wandu wose;

²borenyi gha wubaa ghwa irina jake, kasenyi wubaa ghwake.

³Ghambenyi kwa Mlungu, “Mabonyo ghako ni gha mashiniko saki! Ndighi rako ni mbaa hata wamaiza wako wiakughoghomia.

⁴Wandu wose wa ndoenyi wakutasa oho, nawo wakuboria makaso; wajiboria irina jako makaso.”

⁵Choonyi mmbone seji Mlungu ubonyere: mabonyo ghake ghiaobosha wandu.

⁶Oreighalusireghe bahari ikawuya ndoe iomie, wandu wereidieghe na maghu aghadi ya moda. Aho dikaboilwa andenyi kwake.

⁷Wadabonya nguma kwa kudima kwake kwa kala na kala, ukirizighana mbari ra wandu; waleghi wisekujose aighu yake.

⁸Mkasenyi Mlungu odu inyo wandu, lwaka lomkasa ndelusikirike.

⁹Wadikaishire moyo, na kudilindia disegho.

¹⁰Kwaditimie ee Mlungu; kwaditimie seji feza ieleshwagha kwa modo.

¹¹Kwadingirie mdeghonyi, kukadidukishira misigo ilemere maweghenyi kodu.

¹²Kwasighie wamaiza wedu wikadichang'acha-chang'acha; daidie aghadi ya modo na machinyi, ela sena kukadireda andu kwa banana.

¹³Nichangia nyumbenyi kwako na vizongona vekora, nichafunya malipo gha maghemi ghapo;

¹⁴nichakufunyira ivo nerelaghirieghe, ingelo nerekoghe wasinyi.

¹⁵Nichakufunyira vizongona vekora vinorie, nichakufukiria vizongona va bauru, na va njau, na va mburi.

¹⁶Choonyi msikire inyo mmbose mumuobuagha Mlungu, choonyi, nani nichamghoria agho unibonyere.

¹⁷Neremkemieghe unitesie, nani ngamkasa kwa lumi lwapo.

¹⁸Ngera nedeghesha kiwiwi chingi ngolonyi, BWANA nderenisikiragha anduangi.

¹⁹Ela loli Mlungu wanisikire, ukasikiria ilombi japo.

²⁰Mlungu ndekaso, angu useleghie ilombi japo hata ndelekie kunikunda.