Read TAITA BIBLE – Biblia Ilagho Jiboie Kwa Wandu Wose ZABURI 69 Bible Online

ZABURI 69 - TAITA BIBLE – Biblia Ilagho Jiboie Kwa Wandu Wose bible

ZABURI 69

¹Nikire ee Mlungu! Niamba nimilo ni machi.

²Namilika andenyi ya mazozo ghimilie, na andu komaziria maghu ndekuko; nangirwa andenyi ya machi ghimilie nagho ghaawuyaida aighu yapo.

³Nalila ngasilwa ni ndighi, hata marangi ghapo ghikaoma. Nawesera wutesia ghwa Mlungu wapo, hata meso ghapo ghidawona miramira.

⁴Wandu wizamilwagha ni ini duu, ni wengi kuchumba mtalo ghwa iridia japo. Wamaiza wapo waawuyanidungia malagho gha tee; weko na ndighi nyingi nawo weekunda kunibwagha. Naawuyalipishwa icho niseiwie.

⁵Kwaichi wukelu ghwapo, ee Mlungu, makosa nibonyere ndeghivisikie kwako anduangi.

⁶Kusakesigha wandu wikusuwiriagha wifusho waya kwa wundu ghwapo ee Bwana MLUNGU wa majeshi; kusakesigha awo wikulolagha wisowelo ishima kwa wundu ghwapo, ee Mlungu wa Israeli.

⁷Narumaghia masholio kwa wundu ghwako, hata nafwa waya nandighi.

⁸Nawurie mundu wa kighenyi kwa wanidu, na muchi kwa wanidu wa mao.

⁹Iriso jeikunda nyumba yako janibwagha, na masholio werekusholieghe oho ghanipatire ini.

¹⁰Iji nerelilieghe ngifunga tumu, neresholeloghe ni wandu.

¹¹Iji nererwaeghe nguwo ra magunia kwa wasi, wandu werenisekieghe.

¹²Nadadedwa ni wandu wiseagha kidombo mwandunyi, na wawongeri wadanidunga chumbo rizamie.

¹³Ela ini nadakulomba oho ee BWANA, kunitumbulie ngelo irumirikie kwako. Kunitumbulie kwa lukundo lukatie ee Mlungu, angu koko mloli.

¹⁴Kunivuvuo nisemilo ni mazozo; kunikire na wamaiza wapo, kunikire na machi ghimilie.

¹⁵Kusakenisigha nidwalo ni machi, hata kumilwa ni machi angu kungia kaburinyi.

¹⁶Kunitumbulie ee BWANA, angu lukundo lwako lukatie lwaboie. Nighalukie kwa wughoma ghwako mungi.

¹⁷Kusakekuvisa kwapo ini mdumiki wako, neko na wasi, shashira kunitumbulie.

¹⁸Soghoda kaavui, kunikombuo. Nivuvuo kufuma kwa wamaiza wapo.

¹⁹Kwaichi kusholelwa kwapo, waya ghwapo, na kusowelwa ishima kwapo; kwawiichi wamaiza wapo wose.

²⁰Madukano ghanibwaghie ngolo, ngasirilwa putu ni isuwirio. Nalolie oniwonia wughoma, ngamsowa; ngalola onihoresha, ela siwonie ungi.

²¹Wereninekieghe sumu, wulalo ghwa vindo; Iji nereomieghe, wikanineka siki.

²²Karamu rawo nderiwuye shaghala, na ndima rawo ra vizongona riwuye mdegho.

²³Kuwibwaghe meso ghawo wisewone, na viwonu vawo kuvingire wunyonge ghwa toe.

²⁴Kuwidirie machu ghako, wipato ni lubio lwako.

²⁵Kambi yawo ndeisigho nduu, mndungi usekaie hemenyi kwawo.

²⁶Wamkoronga uo kumkabie, waja malagho gha luwawo lwa awo kuwishoghunue.

²⁷Kuwiwikie mtalo ghwa kaung'a rawo rose, wisepate ifungu jingi ja kukia kwako.

²⁸Marina ghawo ndeghivuto andenyi ya chuo cha irangi, hata wisakengirwa andenyi ya mtalo ghwa wahachi.

²⁹Ela ini neko na kuwawa kwa wundu ghotirirwa; kukia kwako kuniwusire ighu ee Mlungu.

³⁰Nichamkasa Mlungu kwa lumbo, nichamkuma kwa kumfunyira chawucha.

³¹Ilagho ijo jicham'boia BWANA kuchumba kumfunyira ng'ombe, angu njau ifunyire mbembe na kochokocho.

³²Awo wikorongelo, wichawona na kuboilwa; inyo mumlolagha Mlungu, mkaisho moyo.

³³BWANA wadawisikira awo wisowagha, hata ndemenyagha wandu wake wifungilo anduangi.

³⁴Mlungunyi na ndoenyi nderimkase; bahari na vose viko andenyi yaro ndevimkase.

³⁵Mlungu uchaikira Jerusalemu, na kuiagha sena mizi ya Juda. Wandu wake wichakaia aho, na kujiwusa isanga.

³⁶Kivalwa cha wandu wake chichajipata ifwa ijo isanga, na awo wimkundagha wichakaia aho.