Read TAITA BIBLE – Biblia Ilagho Jiboie Kwa Wandu Wose ZABURI 72 Bible Online

ZABURI 72 - TAITA BIBLE – Biblia Ilagho Jiboie Kwa Wandu Wose bible

ZABURI 72

¹Kumfundishe mzuri kutanya kwa loli yako ee Mlungu, na kumfundisha mwana wa mzuri utanye kwa hachi yako.

²Kum'bonye utanye wandu wako kwa hachi, na wakiwa wako uwitanye kwa loli.

³Mighondi mibaa na mitini, ndeifunyire wandu mavalo kwa hachi.

⁴Kumneke kuwidederia wakiwa, uwitesie awo wisowagha, na kumsima mkorongi.

⁵Kumneke kudua moyo luma, ngelo rose iruwa na mori viko aghadi ya vivalwa vose.

⁶Kumneke kukaia sa vua inyagha anyasinyi ridumbulo, na sa mshushure ghuinyosheragha ndoe.

⁷Matuku ghake, hachi ndeichurikie; na sere ichuo kwa wungi matuku ghose, hata mori ghwasia.

⁸Kumneke kubonya nguma kufuma bahari hata bahari, na kufuma Moda ghwa Eufrate hata kutua kwa ndoenyi.

⁹Awo wisimanagha nao, ndewighoghome imbiri kwake, na wamaiza wake wilete teri.

¹⁰Wazuri wa Tarshishi, na awo wa visiwa, ndewimlipe kodi; na wazuri wa Sheba na Seba ndewimredie manosi.

¹¹Wazuri wose ndewimghoghomie, na mbari rose rimdumikie.

¹²Wadamkira uo usowagha iji wawanga; mkiwa, na uo usewadie mtesia wadamkira wokoni.

¹³Wawadie wughoma kwa wanyonge na awo wisowagha, nao wadawikira awo wisowagha.

¹⁴Awo wikorongwaghwa na kubonyerwa kinyanya wadawikombua; wawona seji irangi jawo jiko ja zoghori mbaa.

¹⁵Mzuri ndeduo moyo luma, uneko dhahabu ya Sheba! Malombi ndeghibonyo kwa wundu ghwake tulituli, na kurasimilwa dime dii.

¹⁶Viro ndevikaie isangenyi kwa wungi, ndevidikedike aighu mighondinyi; mavalo gharo ndeghikaie sa gha Lebanoni; wandu wichuo mizinyi wikaie sa nyasi ra mlambenyi.

¹⁷Irina ja mzuri ndejiduo kwa kala na kala, na sare yake iere na kukaia luma sa iruwa. Wandu ndewilombe irasimio kwa chia yake, na mbari ra wandu rose rimmbange mrasimilwa.

¹⁸BWANA, uo Mlungu wa Israeli ndekaso; uo uekeri ubonyagha maza ra mashiniko.

¹⁹Irina jake ndejikaso kwa kala na kala, ndoenyi kose kuchuo wubaa ghwake. Amen, Amen.

²⁰Malombi gha Daudi, mwana wa Jese ghatua.