Read TAITA BIBLE – Biblia Ilagho Jiboie Kwa Wandu Wose ZABURI 73 Bible Online

ZABURI 73 - TAITA BIBLE – Biblia Ilagho Jiboie Kwa Wandu Wose bible

ZABURI 73

¹Loli Mlungu ni mucha kwa Israeli, ni mucha kwa awo wielie ngolonyi kwawo.

²Ela ini, nadaamba nifo ngolo, nedeeka kaavui na kusirilwa ni irumirio.

³Kwa kukaia nedewadwa ni iriso ja wang'eti, niendawona wawiwi wikikaia nicha.

⁴Awo ndewine luwawo lungi; mimbi yawo eeka banana sena idendere.

⁵Ndewijagha wasi sa wandu wazima, hata ndewipatwagha ni bugha ringi sa wandu wazima.

⁶Kwa huwo wakujosa sa kurwa lukange; lung'eto ni sa irwao jawo.

⁷Wabandie hata wikafumwa ni meso; ngolo rawo reechulwa ni wukelu.

⁸Wadema sare na kudeda kisha, wakujosa na kuzaruma kukoronga wazima.

⁹Wadeda kiwiwi aighu ya Mlungu uko mlungunyi, na kufunyira wandu wiko ndoenyi memu kwa lukaso.

¹⁰Kwa huwo hata wandu wa Mlungu weni waghaluka na kuwikasa, nawo warumiriana na ghose wibonyagha.

¹¹Waghamba, “Mlungu umanya wada? Uo-Uko-Aighu-Nandighi waichi ilagho jingi?”

¹²Huwo niko wandu wawiwi wiko; weeka na iseko ngelo rose, na mali rawo rachurikia.

¹³Needuakuelesha na kuleghabonya kaung'a duu.

¹⁴Kwa kukaia needuabulwa dii, na kunekwa adhabu kula nakesho.

¹⁵Na wei needuadeda huwo, sakaiagha mloli kwa kivalwa cha wana wako.

¹⁶Ela niduakunda kutambukilwa ni agho malagho, gheenilema.

¹⁷Ela iji nachangia andenyi ya Andu kwa Wueli kwa Mlungu, niko nicheemanya kutua kwa wawiwi.

¹⁸Loli kwadawiwika andu kwa madende, na kuwibonya widenderuke, wigho na kutota.

¹⁹Wanoneka shwa-shwa! Wainjwa na kusoweka kwa chia eobosha.

²⁰Wakaia sa ndodo iliwikagha nakesho. Kawona kwawuka ee BWANA, kuchawibonya wilaghae sa visuka.

²¹Iji nerewawiloghe, na ngolo yapo kuvavirika,

²²nedeeka mkelu nisemanyagha, ngakaia sa nyamandu imbiri kwako.

²³Elaima nekwanye na oho tulituli; kwawuyaniwadia mkonu ghwapo ghwa kiwomi.

²⁴Kwawuyanighenja kwa njama yako; konyuma kuchaniwusa kwa wubaa.

²⁵Ni ani niko nao mlungunyi ela oho? Hata ndekuwadie kindo chingi ndoenyi nichikundagha kuchumba oho.

²⁶Mumbi ghwapo na akili rapo radima kusilwa ni ndighi, ela Mlungu ni ndighi rapo nao nuo nimkundagha kwa kala na kala.

²⁷Awo wikuleghagha, loli wichatota; na awo wiseko waloli kwako, kuchawisaghisa.

²⁸Ela ini, ni nicha nikaie kaavui na Mlungu; nipate wulindiri ghwa Bwana MLUNGU, na kueresha malagho gha kazi rake rose.