Read TAITA BIBLE – Biblia Ilagho Jiboie Kwa Wandu Wose ZABURI 74 Bible Online

ZABURI 74 - TAITA BIBLE – Biblia Ilagho Jiboie Kwa Wandu Wose bible

ZABURI 74

¹Ee Mlungu, kwaki kwadilegha putu? Kwaki kuwibonyeragha wandu wako machu?

²Kumbuka wandu wako korewisaghueghe kala, kukawikombua wuzumbenyi wipate kukaia mbari ya ifwa jako. Kumbuka Mghondi ghwa Sioni, andu korekoghe kukikaia.

³Sela aghadi ya agha maghacho; m'maiza wanonie kula kilambo chiko andenyi ya Hekalu.

⁴Wamaiza wako waruruma aghadi ya Hekalu yako; Wawusira viweto vawo vikaie alama yawo.

⁵Wakaia sa wandu wiwusiragha masoka wideme midi kilembenyi.

⁶Werebarieghe mbau rose rikomeshero kwa masoka na nyondo.

⁷Wikakora Hekalu yako, na kukulusha andu oho kutasirwagha.

⁸Wikaghora ngolonyi kwawo, “Dichawisima putu;” wikakora kula andu kuwikilo komtasira Mlungu isangenyi.

⁹Ndediwuewona alama redu; walodi ndewiduagha, na mndungi aghadi kodu ndewuemanya maza iri rikaia huwu hata lii.

¹⁰M'maiza ukuseka hata lii ee Mlungu? Welee, m'maiza uajisholia irina jako matuku ghose?

¹¹Kwaki kuseditesiagha? Kwaki kukuchagha mikonu yako?

¹²Ela oho Mlungu, ko Mzuri wapo kufuma kala, kuredagha kukia ndoenyi.

¹³Korewaghanyireghe bahari kwa kudima kwako, kukavibara vongo va choka mbaa machinyi.

¹⁴Korevibarieghe vongo va Leviathani, kukamneka nyamandu ra kireti ujigho.

¹⁵Oho koreturueghe mariso na ndoria ra machi, kukaomera meda iseomagha.

¹⁶Ni oho kuumbie kio na dime, kukawika iruwa na mori.

¹⁷Ni oho kuwikie mano yose ya ndoenyi, kukawika kwari na sumesu.

¹⁸Kumbuka seji m'maiza wawuyakuseka ee BWANA, na seji wandu wakelu wijisholiagha irina jako.

¹⁹Kusakewisigha wanyonge wako wikorongo ni wamaiza, kusakeliwa marangi gha wakiwa wako putu.

²⁰Kujitale ilaghano jako, kwa kukaia andu kose kuko kwa kira isangenyi, kwachua Wang'eti.

²¹Kusakewisigha awo wikorongwagha wifusho waya, wakiwa na awo wisowagha ndewikase irina jako.

²²Wuka ee Mlungu, kukudederie, kumbuka seji wandu wisekutalagha wawuyakuseka dime dii.

²³Kusakeliwa ndoghoi ra wamaiza wako, iro nganyi ra watangali wako wiribonyagha tuli tuli.