Read TAITA BIBLE – Biblia Ilagho Jiboie Kwa Wandu Wose ZABURI 78 Bible Online

ZABURI 78 - TAITA BIBLE – Biblia Ilagho Jiboie Kwa Wandu Wose bible

ZABURI 78

¹Sikirienyi mafundisho ghapo ee wandu wapo, deghenyi madu msikire malagho nimghoriagha!

²Nichadeda kwa ikatanisho, na kughora malagho ghikurie gha kala,

³agho dereghisikireghe na kughimanya, agho dighorelo ni weke aba.

⁴Ndedichaaghivisa kwa wana wawo, ela dichaghighora kwa kivalwa chichagha agho mabonyo gha BWANA gha wubaa, na kudima kwake; na agho mashiniko oreghibonyereghe.

⁵Orewikieghe memu kwa kivalwa cha Jakobo, ukawineka wandu wa Israeli sharia; ukalaghira weke aba wirifundishe wana wawo,

⁶eri kivalwa chichagha, awo wana wisevalo wirimanye, nawo wiwuke na kuwighoria wana wawo.

⁷Kwa chia iyo wichawika irumirio jawo kwa Mlungu hata ndewichaaliwa kazi rake, ela wichaiwadia memu yake.

⁸Ndewichaaghilika na kulegha sa weke wawae, awo wiserekoghe na irumirio jimange kwa Mlungu hata kukaia mloli kwake.

⁹Waefraimu awo werekoghe na ndana na mawanu, werekimbirieghe wudenyi.

¹⁰Ndewerejiwadieghe ilaghano jawo na Mlungu, wikalegha kusikira sharia rake.

¹¹Wereghiliwieghe agho oreghibonyereghe, na awo weke mwakilimbiti werewonieghe ukiwibonya.

¹²Mlungu orebonyereghe weke mwakilimbiti wurindinyi ghwa Sioni; andenyi ya isanga ja Misri weke ndee wikiwona.

¹³Orewaghanyireghe bahari wikaida aghadi yaro; ukabonya machi ghitumbanyike kitungu.

¹⁴Orewighenjereghe kwa iwingu nadime; nakio chee ukawighenja kwa mwengere ghwa modo.

¹⁵Orebarieghe magho kireti, ukawineka machi ghenywa kwa wungi seji ghiafuma andu kumilie.

¹⁶Orebonyereghe igho jibuse dumeda, na kubonya machi ghisee nokoisi sa meda.

¹⁷Ela sena werechurieghe kum'bonyera Mlungu kaung'a, wikamlegha Uo-Uko-Aighu-Nandighi aho kireti.

¹⁸Weremtimieghe Mlungu kidali, kwa kukaia na bea ya vindo werevikundieghe.

¹⁹Wikamdedia Mlungu kiwiwi wikighamba, “Mlungu wadima kufunya vindo kireti?

²⁰Orekabieghe igho machi ghikafuma na dumeda dukaisa machi kwa wungi. Welee, wadima wokoni kufunya vindo angu nyama kwa wandu wake?”

²¹BWANA wendasikira, ukajokwa ni machu mabaa loli loli; ukawikaba wandu wa Israeli, machu ghake ghikawuka aighu yawo,

²²kwa kukaia ndewerekoghe na irumirio kwake hata ndewererirumirieghe ndighi rake rekira anduangi.

²³Ela sena ukaghifunyira mawingunyi koighu momu, na minyango ya mlungunyi ikarughuka.

²⁴Ukawinyeshera mana wipate kuja, ukawineka viro va mlungunyi.

²⁵Wandu wikaja vindo va weke malaika, Mlungu orewinekieghe kwa wungi.

²⁶Oreibonyereghe mbeo ya mashariki ikaweta mawingunyi, ukaiwetesha mbeo ya kusinyi kwa ndighi rake.

²⁷Ukawiredia nyama kwa wungi sa teri, nyonyi nyingi riburukagha sa msangagha ghwa baharinyi.

²⁸Ukaribonya ripakie ghadi na ghadi ya kambi yawo, andu kose wandu werekoghe wikikaia.

²⁹Nawo wikaja wikaghuda loli-loli, angu Mlungu orewinekieghe ivo werekundieghe.

³⁰Ela imbiri wisemerie kuja ivo vindo werevikundieghe, ingelo cheni werekoghe wikija.

³¹Mlungu ukajokwa ni machu aighu yawo, ukawibwagha wandu wawo werekoghe na ndighi kuchumba, na kupunguza wandu wa irika wa Israeli.

³²Chiaimweri na agho, wandu wikachuria kubonya kaung'a; uduabonya agho mashiniko ndewicherumiria.

³³Kwa huwo ukaghimeria matuku ghawo sa miruke, na miaka yawo kwa kuobua.

³⁴Iji orewibwaghieghe wamu, awo weresigharikieghe wikahea na kumlola Mlungu kwa loli.

³⁵Wikakumbuka kukaia Mlungu nuo orekoghe mlindiri wawo, uo Mlungu Uo-Uko-Aighu-Nandighi mkomboli wawo.

³⁶Ela weremkalieghe kwa memu yawo, wikatumia chumi rawo kumghoria tee.

³⁷Ndewerekoghe na irumirio jimange kwake, hata ndewerekoghe waloli kwa ilaghano jawo nao.

³⁸Ela uo kwa kukaia wa wughoma, orewifuyeghe wughoma kaung'a rawo hata nderewitoteshereghe anduangi. Oreghimazirieghe machu ghake mando mengi, eri ghisechewuka ghose.

³⁹Ukakumbuka kukaia awo ni wadamu tu, wiko sa mbeo iidagha isechaawuya sena.

⁴⁰Ni kalinga werekoghe wikimlegha kireti, na kumvavira ngolo ikarenyi!

⁴¹Weremtimieghe sena na sena, na kum'bonya Uo Mweli wa Israeli ujoko ni machu.

⁴²Ndewerekumbukieghe ndighi rake nyingi, hata na ituku orewikombueghe kufuma kwa wamaiza wawo.

⁴³Ingelo orebonyereghe mashiniko Misri, na weke mwakilimbiti wurindinyi ghwa Soani.

⁴⁴Oreghalusireghe meda yawo ikawuya bagha, nawo wikalemwa ni kunywa machi gharo.

⁴⁵Oredumieghe izungu ja izi aghadi kwawo rikawiluma, na vichula vikawinonia isanga jawo.

⁴⁶Orenekieghe vivunyu miwalwa yawo, na zighe rikaja vindo vawo wividumikie.

⁴⁷Ukainona mizabibu yawo kwa vua ya magho, na miku yawo kwa barafu.

⁴⁸Ng'ombe rawo rerebwaghiloghe ni vua ya magho, na ng'ondi rawo rikabwaghwa ni lukuwa.

⁴⁹Ukawidiria machu ghake mabaa, lubio, makai na wasi, ijo ijeshi ja malaika wenona.

⁵⁰Ndereghimazireghe machu ghake, hata kulegha wisefo, ela ukawisigha wibwagho ni saka ya ngawawi.

⁵¹Ukawibwagha wavalwa wa imbiri wose wa Misri, iro ndighi rawo ra imbiri, andenyi ya hema ra kivalwa cha Hamu.

⁵²Niko ukawifunya wandu wake sa ng'ondi, ukawighenja kireti sa chagha cha ng'ondi.

⁵³Orewighenjereghe banana, hata ndewereobueghe anduangi, ela wamaiza wawo wikamilwa ni bahari.

⁵⁴Nao ukawireda isangenyi jake ja wueli, isanga ja mighondinyi oresimieghe ukajiwada.

⁵⁵Oreriwingieghe mbari zima imbiri kwawo, ukawiwaghia na kuwineka ifwa; ukavibonya vichuku va Israeli vikaie andenyi ya mizi yawo.

⁵⁶Ela sena wikamtima na kumlegha Mlungu Uo-Uko-Aighu-Nandighi, hata ndewereiwadieghe memu yake anduangi.

⁵⁷Ela wereghalukieghe noko, wikabonya mikalo sa weke ndee; wikasowa wuloli sa ndana ikomekie.

⁵⁸Weremvavirieghe ngolo kwa kubonya andu kwawo kotasa milimu; wikammbwasira iriso kwa kutasa fwana rawo riwachiro.

⁵⁹Mlungu uendawona huwo, ukazamilwa nandighi; nao ukamlegha Israeli putu.

⁶⁰Oresighieghe Shilo andu kwake kokaia, ukasigha iyo hema andu orekoghe ukikaia aghadi ya wandu.

⁶¹Ukasigha Sanduku ya Ilaghano, iyo iko alama ya ndighi rake, na wubaa ghwake idwalo wunyika.

⁶²Orezamiloghe nandighi ni wandu wake, ukawisigha wibwagho ni wamaiza wawo.

⁶³Wadawana wawo werebwaghiloghe wudenyi, na wai wawo wikasowa kulowolwa.

⁶⁴Wakohani wawo werebwaghiloghe kwa lufu, na waka wawo wikaghirilwa kulila.

⁶⁵Niko BWANA ukawuka seji odelala, na kubonya seji mundu uko na ndighi ukemagha ukanywa divei.

⁶⁶Nao ukawiwinga wamaiza wake na kuwisima, ukawifusha waya kwa kala na kala.

⁶⁷Orechileghieghe kivalwa cha Josefu, hata nderesaghueghe kichuku cha Efraimu anduangi.

⁶⁸Ela oresaghueghe kichuku cha Juda, na Mghondi ghwa Sioni ugho ughukunde.

⁶⁹Oreaghieghe Andu kwake kwa Wueli ighu sa mawingunyi, sa ndoenyi iyo uimangishire kwa kala na kala.

⁷⁰Oremsaghueghe Daudi mdumiki wake, ukamfunya chaghenyi cha ng'ondi,

⁷¹ukamreda kufuma kulishenyi ng'ondi, upate kukaia mlisha wa wandu wa Israeli, ifwa jake.

⁷²Ukawilisha kwa ngolo ndicha, na kuwilongoza kwa wuya.