Read TAITA BIBLE – Biblia Ilagho Jiboie Kwa Wandu Wose ZABURI 83 Bible Online

ZABURI 83 - TAITA BIBLE – Biblia Ilagho Jiboie Kwa Wandu Wose bible

ZABURI 83

¹Ee Mlungu kusakenyama kima, kusehore hata kusekaie duu.

²Zighana wamaiza wako wiabonya nganyi; awo wizamilwagha ni oho wakulegha.

³Wabonya mipango ya mikalo aighu ya wandu wako; wabonya njama aighu ya wandu kuwilindiagha.

⁴Waghamba, “Choonyi diimerie imbari putu, na irina ja Israeli jisewuekumbukwa sena.”

⁵Hee, warumiriana kwa ngolo imweri; wabonya ilaghano jekubonya kiwiwi.

⁶Wandu wa Edomu, na Waishmaeli; Wamoabu na Wahagari;

⁷Wagebali, Waamoni na Waamaleki; Wafilisti na wandu wikaiagha Tiro;

⁸Wokoni Waashuru wawadana nawo; ni waghenyi wabaa wa Waamoni na Wamoabu, kivalwa cha Loti.

⁹Kuwibonye seji korebonyereghe Wamidiani, na Sisera, na Jabini, moda ghwa Kishoni,

¹⁰awo weretotesheroghe aja Endori, wikawuya kitungasi cha ndoe.

¹¹Kuwibonye vilongozi vawo sa iji koni korewibonyereghe Orebu na Zeebu; kuwisime wabaa wawo sa iji korewibonyereghe Zeba na Zalimuna;

¹²awo wereghambieghe, “Ndediwuse isanga ja Mlungu.”

¹³Kuwibonye wikaie sa teri idukwaa ni kiremba ee Mlungu, na sa makanda ghidukwagha ni mbeo.

¹⁴Seji modo ghulunguragha msidu, na seji lumu lwa modo lukoragha mighondi,

¹⁵huwo koni kwa kuwikimbirishe kwa kiremba chako, na kuwiobosha kwa mbeo yako mbaa.

¹⁶Kuwibonye wifo waya ee BWANA, eri wipate kukulola oho.

¹⁷Kuwibonye wisimo na kukambirwa chongo matuku ghose; wifo kuseko ishima.

¹⁸Kuwibonye wimanye kukaia ni oho kuekeri kuwangwagha BWANA; M'bonyi nguma m'baa ndoenyi kose.