Read TAITA BIBLE – Biblia Ilagho Jiboie Kwa Wandu Wose ZABURI 84 Bible Online

ZABURI 84 - TAITA BIBLE – Biblia Ilagho Jiboie Kwa Wandu Wose bible

ZABURI 84

¹Yaboie saki Hekalu yako ee BWANA wa majeshi!

²Nakunde na ndighi kukaia aho! Neko na bea ekaia andu kukaiagha BWANA. Nicham'boria Mlungu uko moyo kwa kuboilwa kubaa.

³Hata ndurumu eko na muzi, na mbeumbeu eko na kijungi chake, chevaia vana vake madhabahunyi kwako ee BWANA; Mzuri wapo na Mlungu wapo.

⁴Warasimilwa awo wikaiagha Hekalunyi kwako, wikikuboria makaso matuku ghose.

⁵Warasimilwa wandu wipatagha ndighi kufuma kwako, wiko na bea eghenda Sioni.

⁶Wikakaida aghadi ya vololo iomie ya Baka, yadawuya andu kwa ndoria ra machi; vua ya kwari yadaichura viriwa va machi.

⁷Wachuria kupata ndighi wikighenda; hata kula umu uwoneke imbiri ya Mlungu Sioni.

⁸Ee BWANA Mlungu wa majeshi, sikira malombi ghapo; nisikirie ee Mlungu wa Jakobo.

⁹Mrasimie Mzuri odu ee Mlungu; kumzighane uo Msaghulwa wako.

¹⁰Kusinda Hekalunyi kwako ituku jimweri, kwachumba matuku elfu andu kuzima. Ni baa kukaia mlindiri wa mnyango ghwa nyumba ya Mlungu wapo, kuchumba kukaia andenyi ya mizi ya wandu wawiwi.

¹¹BWANA ni mlindiri odu na mzuri wa wubaa; wadadirasimia kwa wughoma na ishima. BWANA ndewiimagha kindo chingi chiboie wawuyaghenda nicha.

¹²Warasimilwa mundu ukurumiriagha oho ee BWANA wa majeshi.