Read TAITA BIBLE – Biblia Ilagho Jiboie Kwa Wandu Wose ZABURI 85 Bible Online

ZABURI 85 - TAITA BIBLE – Biblia Ilagho Jiboie Kwa Wandu Wose bible

ZABURI 85

¹BWANA kwajifue wughoma isanga jako, kukammbunjira Israeli mecha ghake.

²Oho kwawifuye wughoma wandu wako ikosa jawo, kukawilekia kaung'a rawo rose.

³Kwasighie kubia kwako kose, kukahoresha machu ghako mabaa.

⁴Kudiwunje sena ee Mlungu Mkiri odu; kuleke makai ghako cha kodu.

⁵Welee, kuadibonyera machu matuku ghose? Machu ghako ndeghisiagha?

⁶Welee, ndekuwuyaadikaisha moyo sena, wandu wako wipate kuboilwa?

⁷Kudiwonyere lukundo lwako lukatie ee BWANA, kudineke kukia kwako.

⁸Naawuyasikiria seji BWANA MLUNGU ughoragha; waawuyadilaghira sere isi wandu wake, iji disewurie kubonya malagho gha wukelu.

⁹Loli oko tayari kuwikira awo wimuobuagha, eri wubaa ghwake ghupate kudua isangenyi kodu.

¹⁰Lukundo na wuloli richakwana; hachi na sere richasusughana.

¹¹Wuloli ghuchajoka kufuma ndoenyi, na hachi ichazighana kufuma mlungunyi.

¹²Hee, BWANA uchadineka icho chiboie, na isanga jedu jichafunya mavalo gharo.

¹³Hachi ichamkiria BWANA, na kum'boisira chia eidia.