Read TAITA BIBLE – Biblia Ilagho Jiboie Kwa Wandu Wose ZABURI 89 Bible Online

ZABURI 89 - TAITA BIBLE – Biblia Ilagho Jiboie Kwa Wandu Wose bible

ZABURI 89

¹Nichabora matuku ghose malagho gha lukundo lwako lukatie kwa kala na kala ee BWANA; nichaeresha malagho gha wuloli ghwako kwa vivalwa vose.

²Lukundo lwako lukatie ni lwa kala na kala; wuloli ghwako ghooka ghumange sa mawingunyi.

³Oho kwaghambie, “Namerie kubonya ilaghano na msaghulwa wapo, ngamghemia Daudi mdumiki wapo ngighamba:

⁴‘Nichachibonya kivalwa chako chiduo kwa kala na kala, na kumangisha kifumbi chako cha nguma vivalwa vose.’”

⁵Awo wiko mlungunyi ndewikase kazi ra mashiniko ee BWANA; ndewikase wuloli ghwako aghadi ya ikwanyiko ja waeli.

⁶Nani uko mlungunyi udimagha kufwananishwa na BWANA? Nani wa awo wiko mlungunyi ufwanane nao?

⁷Mlungu wadaobolwa andenyi ya mwandu ghwa waeli; wadaobosha kuchumba wose wiko mbai mbai kwake.

⁸Ee BWANA Mlungu wa majeshi, nani uko na ndighi sa oho ee BWANA; oho koko mloli kwa maza rose.

⁹Oho kwadaghubonyera nguma msukosuko ghwa bahari; mivo-mivo yaro ikawuka kwadaihoresha.

¹⁰Koreifashireghe ija nyamandu mbaa Rahabu, kukaibwagha; korewisimieghe wamaiza wako, kwa ndighi rako mbaa.

¹¹Mlungunyi ni kwako, na ndoenyi wori ni kwako; koreghubonyereghe wurumwengu na vose viko andenyi yaro.

¹²Kwaumbie kaskazinyi na kusinyi; Mghondi ghwa Tabori na Mghondi ghwa Hermoni yadakukasa kwa kuboilwa.

¹³Oho koko na kudima, mkonu ghwako ghwawadie ndighi, ugho mkonu ghwako ghwa kiwomi ghukumikie.

¹⁴Wuzuri ghwako ghoomangishwa aighu ya hachi na loli; oho kwadabonya maza rose kwa lukundo lukatie na wuloli.

¹⁵Warasimilwa wandu wiichi kukuzumia, awo wighendagha na mwengere ghwako ee BWANA.

¹⁶Wadasinda wikiboilwa kwa wundu ghwako; wadarasimilwa kwa wundu ghwa hachi yako.

¹⁷Kwawineka wusimi m'baa, na kwa lukundo lwako wakaia na wusimi.

¹⁸BWANA nuo uwisaghue mlindiri wawo; Mlungu mweli wa Israeli nuo uwinekie mzuri wawo.

¹⁹Kala, koreghorieghe na wadumiki wako wa loli kwa mawono kukaghamba: “Namteserie mndumu uko ing'oni ja wuda; namjosere mndumu nimsaghue kufuma kwa wandu.

²⁰Nampatire Daudi mdumiki wapo, ngamshinga mavuda ghapo gha wueli.

²¹Uchakaia na ndighi rapo matuku ghose; wudimi ghwapo ghuchamneka ndighi.

²²M'maiza wake ndechaadima kumkalia jingi, hata mmbiwi ndechaamsima anduangi.

²³Nichawifasha-fasha wamaiza wake ukiwona, na kuwibwagha awo wizamilwagha ni uo.

²⁴Nichamkunda na kukaia mloli kwake; nicham'bonya ukaie msimi matuku ghose.

²⁵Nichammbika ubonye nguma kufuma bahari ya Mediterania hata meda ya Eufrate.

²⁶Nao uchanililia, ‘Oho ko Aba na Mlungu wapo; ko mlindiri wapo na mkiri wapo.’

²⁷Nicham'bonya ukaie mwana wapo wa womi wa imbiri, na mzuri m'baa kuchumba wazuri wose wa ndoenyi.

²⁸Nichamkunda kwa kala na kala, na ilaghano japo nao jichadua kwa kala.

²⁹Nichachibonya kivalwa chake chiduo kwa kala sa mawingunyi, nacho chichabonya nguma matuku ghose.

³⁰“Ela kivalwa chake chikasigha sharia rapo, na kulegha mafundisho ghapo,

³¹wikanona malaghiro ghapo, na kuilegha memu yapo,

³²nichawikaba kwa wundu ghwa kaung'a yawo, na kuwibonya wipate wasi kwa wundu ghwa mawiwi ghawo.

³³Ela sichaaleka kumkunda Daudi, hata sichaasigha kukaia mloli kwake.

³⁴Sichaajichikanya ilaghano japo nao, hata kughalua ilagho jingi nimlaghirie.

³⁵“Naghema putu kwa irina japo ja wueli kukaia, sichaamkalia Daudi.

³⁶Kivalwa chake chichadua matuku ghose, nani nichaghulindia wuzuri ghwake ngelo rose iruwa jiko.

³⁷Ghuchadua kwa kala na kala sa mori, ghuko wushahidi ghwa loli mawingunyi.”

³⁸Ela idana kwam'bonyera machu Msaghulwa wako, kukamlegha na kummbinga noko.

³⁹Kwajichikanyire ilaghano korejibonyereghe na mdumiki wako, na kuchikumba kirumbu chake terinyi.

⁴⁰Kwaghichikanya mawurigha gha muzi ghwake ghose, na kurisigha ngome rake riwuye maghacho.

⁴¹Wandu wose wiidagha waawuyaiwa vilambo vake; wambao wose waawuyamseka.

⁴²Kwawisimishire wamaiza wake, kukawibonya wose wiboilo.

⁴³Kwaghinonie maswagha ghake, kukam'bonya usimo wudenyi.

⁴⁴Kwamsokie mzata ghwake ghwa nguma, na kuching'arisha kifumbi chake cha nguma.

⁴⁵Kwamghoseshere mkoo, na kumfusha waya.

⁴⁶Kukuvisa hata lii ee BWANA? Machu ghako ghiaka sa modo hata lii?

⁴⁷Kumbuka matuku gha irangi japo ni matinieri ee BWANA; kumbuka wadamu wose koowiumba wa kunoneka!

⁴⁸Nani udimagha kudua moyo usefo jingi? Nani udimagha kukulindia usengie kaburinyi?

⁴⁹Bwana, lukundo lwako lwa kala loko hao, ulo koremghemieghe Daudi kwa wuloli ghwako?

⁵⁰Kumbuka seji ini mdumiki wako nawuyasekwa ee BWANA, na seji nawuyarumaghia madukano gha wandu wa mbari zima.

⁵¹Wamaiza wako waawuyamdukana Msaghulwa wako ee BWANA! Waawuyamdukana andu kose ughendagha.

⁵²BWANA ndekaso kwa kala na kala! Amen, Amen.