Read TAITA BIBLE – Biblia Ilagho Jiboie Kwa Wandu Wose ZABURI 90 Bible Online

ZABURI 90 - TAITA BIBLE – Biblia Ilagho Jiboie Kwa Wandu Wose bible

ZABURI 90

¹BWANA, oho ko andu kodu kokaia matuku ghose.

²Imbiri kuseumbie mighondi angu ndoenyi na wurumwengu, oho korekoghe; sena kuchadua kwa kala na kala.

³Kwadamzera mdamu uwuye andu orekoghe; “Kwadamghalusa uwuye ndoe.”

⁴Miaka elfu kwako ni sa ituku jimweri; ni sa ighuo imerie kuida, ni sa izughe jimu ja nakio.

⁵Oho kwadawiduka wandu noko sa gharika; weeka sa ndodo riseduagha. Weeka sa nyasi mbishi ra nakesho,

⁶nakesho rakaia mbishi na kudeghedeka, nakenyi ranyaya na kuoma.

⁷Damerelwa ni machu ghako; daoboshwa ni kubia kwako.

⁸Kwaghifunukua mawiwi ghedu imbiri kwako, iro kaung'a redu ra kiviso reko worinyi imbiri yako.

⁹Matuku ghedu ghose ghamerelwa ni machu ghako; ghasia sa kusoria ngolo.

¹⁰Dadakaia moyo miaka mirongo mfungade; dikakaia na ndighi yavika mirongo wunyanya. Elaima yareda wasi na kuwawa; Yasia shwa shwa nesi daghenda noko.

¹¹Nani uichi ndighi ra machu ghako? Nani umanyagha lubio lwako seji kuobolo?

¹²Kudifundishe kumanya seji matuku ghedu ghiko matini, eri dipate kukaia na hikima.

¹³Kudibonyera machu hata lii ee BWANA? Ghaluka kudiwonie wughoma isi wadumiki wako.

¹⁴Kudichure lukundo lwako lukatie kula nakesho, eri dipate kuboilwa na kuzuma matuku ghedu ghose.

¹⁵Kudineke kuboilwa karakara na matuku koreditiririeghe, na miaka yose ya wasi ghodu.

¹⁶Kudiwonyere kazi rako isi wadumiki wako, na kivalwa chedu chiwone wudimi ghwako ghwa wubaa.

¹⁷Wucha ghwako ndeghukaie aighu kodu ee BWANA Mlungu odu, kurimangishe kazi redu; hee, iro kazi diribonyagha kurimangishe.