Read TAITA BIBLE – Biblia Ilagho Jiboie Kwa Wandu Wose ZABURI 92 Bible Online

ZABURI 92 - TAITA BIBLE – Biblia Ilagho Jiboie Kwa Wandu Wose bible

ZABURI 92

¹Ni nicha kukufunyira chawucha ee BWANA, kukuboria makaso oho Kuko-Aighu-Nandighi;

²kueresha malagho gha lukundo lwako lukatie nakesho, na gha wuloli ghwako nakenyi,

³kwa kubora na zeze na kinubi, na kwa chumbo risingie riborwagha kwa vombo va chuzi.

⁴Naboilwa kwa wundu ghwa mabonyo ghako gha ndighi ee BWANA; nichabora kwa kuboilwa kwa wundu ghwa agho kubonyere.

⁵Ni mbaa saki iro kazi rako ee BWANA! Maghesho ghako gheko ndenyi nandighi!

⁶Mundu usena akili ndedimagha kurimanya; mkelu ndedimagha kuelelwa,

⁷kukaia, hata ngera wawiwi wabuka sa nyasi, na wabonyi kiwiwi wose kughenda imbiri, watanyiro witote kwa kala na kala;

⁸ela oho BWANA koko ighu kwa kala na kala.

⁹Wamaiza wako ee BWANA wichatota; wabonyi kiwiwi wose wichasaghiswa.

¹⁰Ela ini kwanineka ndighi sa ra mbogho, kwaninekie irasimio ja kuboilwa.

¹¹Nawonie kughwa kwa wamaiza wapo, ngasikira kukema kwa wawiwi.

¹²Wahachi wichadeghedeka sa mtende, na kuzoghua sa msida ghuko Lebanoni.

¹³Weeka sa midi iwalo andenyi ya nyumba ya BWANA, wideghedekagha andenyi ya Hekalu ya Mlungu odu.

¹⁴Ikeduaghosia yadavagha matunda toe, nayo yadakaia mmbishi toe.

¹⁵Huwo ni kuwonyera kukaia BWANA ni mhachi, hata ndekuwadie kiwiwi chingi andenyi ya mlindiri wapo anduangi.