Read TAITA BIBLE – Biblia Ilagho Jiboie Kwa Wandu Wose ZABURI 98 Bible Online

ZABURI 98 - TAITA BIBLE – Biblia Ilagho Jiboie Kwa Wandu Wose bible

ZABURI 98

¹M'borienyi BWANA lumbo luwishi, angu wabonya maza ra mashiniko. Wasima kwa wudimi ghwake na kwa ndighi rake ra wueli.

²BWANA wamanyisha kukia kwake; wafunukua hachi yake worinyi kwa iro mbari zima.

³Wakumbuka lukundo lwake lukatie na wuloli ghwake kwa wandu wa Israeli. Wandu wose kula andu wawonie wusimi ghwa Mlungu odu.

⁴Mzumienyi BWANA kwa kuboilwa ndoenyi kose; wusirenyi chwaka mumkase na kum'boria kwa kuboilwa.

⁵M'borienyi BWANA makaso kwa zeze, mkasenyi kwa zeze na chwaka risingie.

⁶Kabenyi tarumbeta na chuembe, mumzumie uo BWANA mzuri odu.

⁷Bahari ndeirurume na vose viko andenyi yaro; wurumwengu na vose vikaiagha andenyi yaro ndevimkase.

⁸Machi ndeghikabe chui, mighondi ndeim'borie BWANA kwa kuboilwa,

⁹angu uacha kughubonyera nguma wurumwengu, Uchawibonyera nguma wandu wiko wurumwengunyi kwa hachi na loli.