Read TAITA BIBLE – Biblia Ilagho Jiboie Kwa Wandu Wose MAKATANISHO 1 Bible Online

MAKATANISHO 1 - TAITA BIBLE – Biblia Ilagho Jiboie Kwa Wandu Wose bible

MAKATANISHO 1

¹Agha ni Makatanisho gha Solomoni mwana wa Daudi, mzuri wa Israeli:

²Makatanisho agho ghiwitesia wandu wimanye hikima na mafundisho mecha; witambukilo ni malagho gha suku.

³Ghichakufundisha kukaia na irangi jekumazira nicha; kukaia mloli na mhachi na mucha.

⁴Ghim'bonya mundu useichi malagho ukaie na akili, na kufundisha wandu wa irika wikaie na kumanya kuboie.

⁵Agha makatanisho ghadima kumchuria mundu wa hikima kumanya, na kumlongoza mundu uko na kishomo,

⁶witambukilo ni maana ivisikie ya makatanisho na mifwano, malagho gha mundu wa hikima na ndawi rawo.

⁷Kuobua kwa BWANA niko kuzoya kwaro kumanya; wakelu wadamenya hikima, na mafundisho mecha.

⁸Mwana wapo, sikira mafundisho gha ndeyo, na mafundisho gha mayo kuseghileghe;

⁹mafundisho ghawo ghichabonya tabia yako ikaie sa kiremba chighokie chongonyi kwako, na sa mkufu singonyi kwako.

¹⁰Mwana wapo, wakaung'a wikakudedia malagho ghesesia-sesia, kuserumire.

¹¹Wikakuzera, “Choo diendelaliria mndumu dim'bwaghe! Ndedimmbwadie dimkabe mundu usewadie ikosa jingi.

¹²Nndokonyi diwimerie sa kumilwa wimoo ni Kaburi; sa awo wiserwagha kaburinyi.

¹³Dichapata vilambo vose va zoghori mbaa, na kuchura nyumba redu navo.

¹⁴Nndoko dighendanye; icho dichaaiwa, dichawagha diwose.”

¹⁵Mwana wapo kuseghendanye na wandu wifwane huwo; kaia kula nawo.

¹⁶Waawuyakimbia wibonye mawiwi; nawo waawuyashashira kudia bagha.

¹⁷Ni duu kuwikiria nyonyi mdegho ikiwona;

¹⁸ela awo wandu waawuyakudeghia shaghala weni; shaghala ichaawibwagha weni.

¹⁹Huwo niko wandu wikaiagha wose, awo wikundagha kupata mali kwa kutumia ndighi; awo winughagha iro chia, wadakubwagha weni.

²⁰Hikima wawanga kwa lwaka lubaa chienyi; wawusira lwaka lwake sokonyi,

²¹wawanga aighu mawurighenyi; wadeda mbengenyi andu kongiria mzinyi:

²²“Inyo wakelu, mkaia wakelu hata lii? Mseka hikima kwa lumenyo hata lii? Wakelu wizamilwa ni kumanya hata lii?

²³Ngamkania msikire; nichamneka njama ndicha, na kummanyisha agho nighiichi.

²⁴Nammbangie, mkalegha kusikira; namnekie wutesia, mkaghulegha.

²⁵Ndemuwuetala njama rapo rose hata ndemuwuewusa mawonyero ghapo.

²⁶Kwa huwo mkapatwa ni ndengwa ingi, nichamseka, iji mwakaja wasi, nichamseka.

²⁷Iji mwakaja wasi sa kukabwa ni kiremba, na wasi ghonyu kukaia sa kikulughulu, iji mwachelwa ni wasi na kuwawa, nichamseka.

²⁸Niko mchaniwanga ini Hikima, ela sichaadika; mchanilola nandighi, ela ndemchaaniwona.

²⁹Kwa kukaia morezamiloghe ni kumanya, mkalegha kumuobua BWANA.

³⁰Moreleghieghe njama rapo, mkamenya kukania kwapo.

³¹Kwa huwo mchaja matunda gha mighendo yenyu na kukatwa ni mipango yenyu cheni.

³²Wandu wisemanyagha wiabwaghwa ni kulegha hikima, na wukelu ghwawo ghuchawitotesha.

³³Ela uhu unisikiragha uchadua banana; uchakaia banana, nao ndechaobua kiwiwi chingi anduangi.”