Read TAITA BIBLE – Biblia Ilagho Jiboie Kwa Wandu Wose MAKATANISHO 18 Bible Online

MAKATANISHO 18 - TAITA BIBLE – Biblia Ilagho Jiboie Kwa Wandu Wose bible

MAKATANISHO 18

¹Mundu okutanya na wambao, ookukunda moni; nderumiriagha ilagho jingi ja hachi.

²Mkelu ndekundagha kuelelwa, ela wadaboilwa ni mawoni ghake gheni.

³Wuwiwi ghukakaia, na lumenyo loko aeni; kusowa ishima kukakaia, na kufushwa waya koko aeni.

⁴Madedo gha mundu, ni sa ndiwa ya machi ghimilie, ela ndoria ya hekima ni kamoda ka machi ghiidagha.

⁵Si nicha kumdawiria mmbiwi, na kumuima hachi mundu usena ikosa.

⁶Madedo gha mkelu ghadareda nganyi; malagho ghake ghadamshekeria ukabo.

⁷Madedo gha mkelu ghadamnona moni, na malagho ghake ni shaghala kwake.

⁸Malagho gha mundu uhohoriagha gheeka sa mikate isingie, ghadamngia mundu kondenyi ngolonyi.

⁹Mundu uko mghadi kwa kazi yake, oofwanana na uo unonagha.

¹⁰Irina ja BWANA ni mnara ghumange; mhachi wadaghukimbiria na kukaia banana.

¹¹Mzuri wa mali wadaririkanya wei mali rake richamlindia, sa wurigha ghwa muzi ghuko ighu.

¹²Mundu wadazoya ukukase imbiri useghue, ela kukusera kwadareda kunekwa ishima.

¹³Mundu ukatumbulia malagho imbiri usesikire, ni wukelu na waya kwake.

¹⁴Roho ya mundu yarumaghiagha wukongo, ela ukafwa ngolo, isuwirio jingi ndejiko.

¹⁵Mundu uwadie suku wadapata kumanya, mundu wa hikima wadalola kumanya.

¹⁶Inosi ja mundu jadam'bonyera chia emreda imbiri ya wabaa.

¹⁷Mundu wazoya kudeda malagho ghake wadawoneka kukaia na hachi, hata mundu wa kawi wacha kumkotia malagho.

¹⁸Kura niyo imeriagha nganyi; yadadumbua malagho gha wandu wawi wisimanagha kwa ndighi.

¹⁹Mtesie mwanyinyu, nao uchakulindia sa wurigha ghwa muzi ghumange, ela kukarashana nao uchakurughia mnyango.

²⁰Mundu wadaghuda kufumanya na madedo ghake; wakatwa ni matunda gha agho udedie.

²¹Madedo gha mundu ghadima kum'bonya ukaie moyo angu ufo, kwa huwo kuchaja agho kughidedie.

²²Mundu ukapata muka, wapata kilambo kicha, na BWANA uchamrumiria.

²³Mkiwa wadalomba kwa kuvoya, ela mzuri wa mali wadatumbulia kwa kubia.

²⁴Weko waghenyi wikubonyagha weni kukaia waghenyi, ela oko mghenyi wa kaavui uchumbie mruna mundu.