Read TAITA BIBLE – Biblia Ilagho Jiboie Kwa Wandu Wose MAKATANISHO 19 Bible Online

MAKATANISHO 19 - TAITA BIBLE – Biblia Ilagho Jiboie Kwa Wandu Wose bible

MAKATANISHO 19

¹Baa mkiwa uko mloli, kuchumba mkelu ughoragha tee.

²Ndeiboie mundu kusowa kumanya; mundu wa shwa-shwa wadakungira ndengonyi.

³Iji wukelu ghwa mundu ghwammnonia mipango yake, wadam'bonyera BWANA machu.

⁴Mali radachuria waghenyi, ela mkiwa wadakimbilwa ni mghenyi wake.

⁵Mshahidi wa tee ndechaasighwa usepatire ikabo, na uo ughoragha tee ndechaafufunuka.

⁶Wandu wengi wadalola kurumirikia kwa wabaa, na kula umu ni mghenyi wa mundu ufunyagha manosi.

⁷Mkiwa wadazamia waruna wose, ni kuchumba saki waghenyi wake kukuwika kula nao! Ukeduawishingira na malagho, wialegha.

⁸Uo uipatagha hikima waajikunda irangi jake; uo uwadiagha kumanya uchawona nicha.

⁹Mshahidi wa tee ndechaakaia usenekelo ikabo, na uhu ughoragha tee uchatota.

¹⁰Ndeimfwane mkelu kuja maseko, wokoni ndeimfwane mzumba kuwibonyera nguma wabaa.

¹¹Kukaia na akili kwadam'bonya mundu umazirie machu ghake, nao wadaboilwa ni kulekia makosa.

¹²Machu gha mzuri gheeka sa mrurumo ghwa shimba, ela wurumirio ghwake ghooka sa mami ghiko nyasinyi.

¹³Mwana mkelu wadamnona ndee, muka orashana ni sa machi ghitonyaa-tonya tuli tuli.

¹⁴Nyumba na mali ni ifwa jipatikagha kwa weke aba, ela muka uwadie suku wadafuma kwa BWANA.

¹⁵Wughadi ghwadareda dilo nyingi, na mghadi wadaja njala.

¹⁶Mundu uwadiagha malaghiro, wadalindia irangi jake; uo umenyagha uchafwa.

¹⁷Mundu umnekagha mkiwa pesa ni sa kumkopesha BWANA na BWANA uchamlipa.

¹⁸Mfundishe mwana wako ngelo uko mtini, kusekaie ngara na kunoneka kwake kwa kuleghamfundisha.

¹⁹Mundu wa machu ghibirie uchalipia ikabo jake; kukatima kumvuvua, kuwuyamvuvua indo jimu sena.

²⁰Sikiria njama, kurumirie mafundisho; kutua kuchapata hikima.

²¹Mipango ya mdamu ni mingi, ela lukundo lwa BWANA nilo lukatishwagha.

²²Ijo jikundikie kwa mdamu ni wuloli, mkiwa wachumba mtee.

²³Kuobua kwa BWANA ni irangi; uo uko nako uchakatwa, hata ndechaapatwa ni kiwiwi chingi anduangi.

²⁴Mghadi wadabegha vindo, ela ualemwa ni kuvisoma.

²⁵Mkabe mundu odema sare, na mkelu uchakufundisha suku; mkemie mundu uelelwagha, nao uchapata kumanya.

²⁶Uo usimanagha na ndee na kummbinga mae, ni mwana uredagha waya na kunona ishima.

²⁷Mwana wapo, kukalegha mafundisho, kuchalaghaya kusowe kumanya.

²⁸Mshahidi uzamie wadainona loli, na mundu mmbiwi wadaboilwa ni makosa.

²⁹Kutanywa kwawivikia wandu wedema sare, na kubulwa kwawivikia wakelu.