Read TAITA BIBLE – Biblia Ilagho Jiboie Kwa Wandu Wose MAKATANISHO 25 Bible Online

MAKATANISHO 25 - TAITA BIBLE – Biblia Ilagho Jiboie Kwa Wandu Wose bible

MAKATANISHO 25

¹Agha ni makatanisho gha Solomoni wokoni, gherebonyeroghe kopi kotinyi ni wandu wa Hezekia mzuri wa Juda.

²Dadamneka Mlungu wubaa kwa maza urivisire kwake, ela wazuri dadawikasa kwa kufunukua malagho.

³Sa iji mlungunyi kuko ighu, na ndoenyi kuko ndonyi, wokoni kwakurie kughitambua maghesho gha wazuri.

⁴Kukainja wuchafu ghwa feza, mchani vuma uchabonya kilambo chiboie.

⁵Wika wanjama wawiwi kula na mzuri, na wuzuri ghwake ghuchamangishwa kwa hachi.

⁶Kusakekuwusira kumoni imbiri ya mzuri, hata kusakekuwika kumoni ighu imbiri ya wabaa.

⁷Ni nicha kuzerwa choo naighu aha, kuchumba kuzerwa baria m'baa.

⁸Kukawona malagho, kusekaie wa shwa-shwa kuenda kotinyi; kubonya wada mmbenyu ukafunya wushuhuda ghokusima?

⁹Kukakaia na ilagho na mmbenyu m'boise mmbeni; kusefunukuo malagho gha mundu mzima ghivisiro,

¹⁰isechekaia uo usikiragha ukufushe waya, na tabia yako inoneke.

¹¹Ilagho jikadedwa nicha, jiakaia sa kipande cha dhahabu chiko andenyi ya sahani ya feza.

¹²Mundu wa hikima ummbonyeragha mmbao ilagho uko tayari kusikira, oko wa zoghori kuchumba pete ya dhahabu angu mapambo gha dhahabu.

¹³Mdumwa mloli ooka sa machi gha mbeo kwa awo wimdumagha ngelo ya mruke ghokuwida; wadawihoresha ngolo weke bwana wake.

¹⁴Mundu ulaghiragha inosi usejifunyagha, ooka sa mbeo ya mawingu ghisewadie vua.

¹⁵M'bonyi nguma wadima kushingirwa malagho kwa irumaghio, na madedo ghiboie ghadima kuboisa malagho ghikurie.

¹⁶Kukawona wuki kooja ghukate, kukaja mungi kwadima kudaika.

¹⁷Kuseghendeghe nyumbenyi kwa mmbenyu shwa kwa shwa, uchekukoja na kuzamilwa ni oho.

¹⁸Mundu umzighiriagha mmbao, ooka sa rungu ya wuda, angu lufu, angu iwanu jikalie.

¹⁹Kukusaghika na mundu useko mloli ngelo kwapatwa ni malagho, ni sa kudafuna na ighegho jisughusikagha, angu kughenda na kughu kuko mkongo.

²⁰Uo um'boriagha mundu uko na wasi ghwa ngolo, ni sa mundu uruagha nguwo ituku ja mbeo, na sa siki idungwaghwa chondenyi.

²¹Ngera m'maiza wako wazughwa, mneke vindo; na ngera waoma, mneke machi ghenywa;

²²angu kuchakaia kwamfusha waya nandighi; na BWANA uchakulipa.

²³Mbeo ya kaskazinyi yadareda vua; na kudeda wandu wadareda machu.

²⁴Baa kukaia aighu mbembenyi ya ipaa ja nyumba, kuchumba kukaia nyumbenyi mbaa na muka wa lubio.

²⁵Malagho mecha ghafuma isanga ja kula, gheeka sa machi gha mbeo ghehoresha kau.

²⁶Mundu wa hachi uwadanagha na wawiwi, ooka sa ndoria iko na wuchafu angu kiriwa chiko na sumu.

²⁷Kuja wuki mungi si nicha, kwa huwo si nicha kulola ishima jichumbie.

²⁸Mundu usedimagha kukumazira moni, ni sa muzi ghusena wurigha.