Read TAITA BIBLE – Biblia Ilagho Jiboie Kwa Wandu Wose MAKATANISHO 28 Bible Online

MAKATANISHO 28 - TAITA BIBLE – Biblia Ilagho Jiboie Kwa Wandu Wose bible

MAKATANISHO 28

¹Wandu wizamie wadakimbia, hata ngera ndewiwuewingwa ni mndungi; ela wandu wa hachi weko na wuwana sa ghwa shimba.

²Mbari ikabonya kaung'a, yadakaia na wabonyi nguma wengi; ela ikakaia na vilongozi vimanyagha na kutambukilwa, ichadua imange kwa ngelo ndacha.

³Mkiwa umkorongagha mkiwa mmbao, ni sa vua mbaa inonagha miwalwa.

⁴Awandu wisighie sharia wadakasa wandu wizamie, ela awa wiiwadie sharia wadasimana nawo.

⁵Wandu wawiwi, ndewiichi kutanya loli, ela awo wimtasagha BWANA, watambukilwa putu.

⁶Mkiwa uko mloli ni baa kuchumba mundu ufughie ughoragha tee.

⁷Mundu uiwadiagha sharia, ni mwana wa hikima; ela mngara wa wandu wa lwafuo, wadamfusha ndee waya.

⁸Mundu uchuriagha mali rake kwa kuvara fwaida, uamtumbanyira mundu uko na wughoma na wakiwa.

⁹Mundu ukalegha kuisikira sharia, hata malombi ghake ghichamzamia Mlungu.

¹⁰Mundu uwilaghashagha wandu wecha wibonye mawiwi, uchachunuka kinenyi chake cheni; ela awo wisewadie ikosa jingi wichapata mafungu ghiboie.

¹¹Mundu ufughie wadakuwona moni kukaia na hikima, ela mkiwa utambukilwagha, uchammanya.

¹²Mundu wa hachi ukasima, wandu wadazuma; ela mundu uzamie ukabonya nguma wandu wake wadakuvisa.

¹³U mundu uvisagha makosa ghake ndepatagha mecha, ela uhu ughirumiriagha na kughisigha uchafuilwa wughoma ni Mlungu.

¹⁴Mundu umnekagha BWANA ishima kari kose, ucharasimilwa; ela uhu ukurishagha ngolo yake uchapatwa ni ndengwa.

¹⁵M'bonyi nguma uzamie ooka sa shimba irurumagha kwa wakiwa, angu sa kibarabara chichumbiagha wandu.

¹⁶M'bonyi nguma usetambukilwagha ni maza, ni mkinyanya mkorongi; ela uhu uzamilwagha ni kushama kusene hachi, uchabonya nguma kwa matuku mengi.

¹⁷Mundu orebwaghieghe mmbao uchakaia mkimbii, ndekaie mkimbii hata kifwa chake; mndungi usemtesie.

¹⁸U mundu ughendagha nicha uchakirwa, ela uo ulagharie kwa chia rake uchawuduka kinenyi.

¹⁹U mundu ulimagha mbuwa yake, uchakaia na vindo vingi, ela uo unughagha maza ra kisha, uchakaia na wukiwa mungi.

²⁰Mundu uko mloli uchachulwa ni marasimio, ela uo ukundagha kufugha shwa-shwa ndechaasowa adhabu.

²¹Kudawiria wandu ndekuboie; ela mundu wadima kukosa kwa wundu ghwa kuhongwa kutinieri.

²²Mundu ukurie na pesa wadashashira kufugha, hata ndemanyagha wei uchasowekelwa.

²³Mkemie mundu, nao uchakufunyira chawucha konyuma; kwachumbie kusesea-sesea.

²⁴Mundu uiwiagha wavi wake ukighesha wei si ikosa jingi, oofwanana na kitoi.

²⁵Mundu wa lwafuo wadawusira nganyi ela uo ukusaghikagha na BWANA uchapata mecha.

²⁶Uo ukusaghikagha na akili rake moni ni mkelu, ela uhu ughendagha kwa hikima uchakirwa.

²⁷Uo uwinekagha wakiwa, ndechaasowa kindo chingi; ela uo usemzighanagha mkiwa, uchawasirwa njowe ni wandu wengi.

²⁸Wandu wizamie wikakabonya nguma, wandu wadakuvisa, ela wikatota, wandu wa hachi wichabonya nguma.