Read TAITA BIBLE – Biblia Ilagho Jiboie Kwa Wandu Wose MAKATANISHO 3 Bible Online

MAKATANISHO 3 - TAITA BIBLE – Biblia Ilagho Jiboie Kwa Wandu Wose bible

MAKATANISHO 3

¹Mwana wapo, kusakeliwa mafundisho ghapo, ela kughiwike malaghiro ghapo ngolonyi kwako.

²Mafundisho ghapo ghichakubonya kuduo luma, na kukubonya kuwone nicha.

³Kusesighe kusikira na wuloli, kurifunge singonyi kwako na kuriandika ngolonyi kwako.

⁴Kwa chia iyo kucharumirikia, na kukaia na sare iboie imbiri ya Mlungu na wandu.

⁵Kumrumirie BWANA kwa ngolo yako yose; kusakeghirumiria mawoni ghako kumoni.

⁶Kum'bonye BWANA uwoneke kwa chia rako rose, nao uchakughenja nicha.

⁷Kusakekuririkanya kumoni kukaia na hikima; kumuobuo BWANA na kutana na kiwiwi.

⁸Ijo jichakaia sa wughanga ghoboisa mumbi ghwako, na kuinja luwawo lwako.

⁹Kum'bonyere BWANA ishima kwa kumfunyira mali rako, na kwa kumneka mavalo ghako ghose gha imbiri gha mbuwenyi kwako.

¹⁰Aho nganya rako richachua viro, na mitungi yako ichachua divei.

¹¹Mwana wapo, kusakemenya kukania kwa BWANA, hata kusezamilo ni kukemia kwake.

¹²BWANA wadamkania uo umkundagha, seji ndee mwana umkaniagha mwana wake umkunde.

¹³Mundu uko na hikima oko na kuboilwa, uo uko na kutambukilwa.

¹⁴Hikima yawadie fwaida mbaa kuchumba feza na dhahabu.

¹⁵Hikima ni ya zoghori mbaa kuchumba lulu; ndekuwadie kindo chingi kuchikundagha chidimagha kufwananishwa nayo.

¹⁶Hikima yadakuneka matuku mengi; na mali na ishima.

¹⁷Chia rake raboie, na mivori yake yose ni sere.

¹⁸Hikima ni mudi ghwa irangi kwa awo wiiwadiagha; awo wiimaziriagha wichaboilwa.

¹⁹BWANA oreumbieghe ndoenyi kwa hikima yake; ukamangisha mawingunyi kwa kumanya kwake.

²⁰Kwa hikima yake, meda yaisa machi, na mawingu ghanyesha vua.

²¹Mwana wapo, wadia hikima ndicha na suku; lindia risekulaghaye.

²²Richakaia irangi kwako, na mapambo singonyi kwako.

²³Kuchaghenda chienyi kwako banana, hata ndekuchaakuwa anduangi.

²⁴Kukaghenda wulinyi ndekuchaaobua, na iji kwalala kuchapata dilo risingie.

²⁵Kusakeobua kiwiwi chingi, hata kunoneka kungi kuredwagha ni wawiwi sa kiremba.

²⁶BWANA uchakuwika banana, uchalindia kughu kwako kusewado ni mdegho.

²⁷Kusakelegha kuwibonyera wucha awo ifwanagha wibonyero ingelo kuko na nguma ewibonyera.

²⁸Kusakemzera mmbenyu uche kesho, ikakaia kudimagha kumtesia idime.

²⁹Kusakem'bonya mmbenyu njama, uo uko kaavui nakumoni ukikurumiria.

³⁰Kusesimane na mundu duu, usekubonyere ilagho jingi.

³¹Kusakebonya iriso na mundu otumia ndighi, hata kusaghua ingi ya chia rake.

³²BWANA wadazamilwa ni mundu uleghie chia rake, ela wadawirumiria wandu wecha.

³³BWANA wadaiwasira mizi ya wawiwi njowe! Ela wadairasimia mizi ya wahachi!

³⁴Wadawimenya awo wimmenyagha, na kuwineka mvono awo wikuseragha.

³⁵Wandu wa hikima wichanekwa ishima, ela wakelu wichasowelwa ishima.