Read TAITA BIBLE – Biblia Ilagho Jiboie Kwa Wandu Wose MAKATANISHO 4 Bible Online

MAKATANISHO 4 - TAITA BIBLE – Biblia Ilagho Jiboie Kwa Wandu Wose bible

MAKATANISHO 4

¹Wana wapo, sikirenyi mafundisho gha ndeyo, mghisikirie nicha, mpate suku.

²Mafundisho nimnekagha ghaboie; mseghisighe.

³Iji nerekoghe mwana mtini nikwanye na aba, nani nedeeka wa ititi kwa mao,

⁴aba orenifundishireghe ukaghamba, “Kunughe malaghiro ghapo, na oho kuchakaia moyo.

⁵Kuseghiliwe, hata kuseghighalukie nambai. Kukaie na hikima; kukaie na suku.

⁶Kusesighe hikima, nayo ichakulindia; kuikunde, nayo ichakuwika banana.

⁷Hikima ni mbaa kuchumba vose; kwa huwo kukaie na hikima na suku.

⁸Kuitale hikima nandighi, nayo ichakujosa; kukaimaziria, ichakubonya kuneko ishima.

⁹Ichakubonya kurusho kiremba chiboie chongonyi kwako; ichakubonya kurusho kirumbu chighokie.”

¹⁰Mwana wapo, sikira agho nikughoriagha kughirumirie, kupate kudua moyo luma.

¹¹Nakufundishire kukaia na hikima; ngakulongoza kwa chia ndicha.

¹²Iji kwakaghenda chienyi ndekuchaatangalwa; kukakimbia, ndekuchaakuwa.

¹³Kumazirie mafundisho, kuseghilekerie; kughilindie, angu ni irangi jako.

¹⁴Kuseghende andu wawiwi wighendagha, hata kusakenugha mfwano ghwa wawiwi.

¹⁵Chia yawo kuileghe, kuseghende nayo; kuighalukie nambai, kughende chia yako zima.

¹⁶Wawiwi ndewilalagha wisaabonya ilagho iwiwi; ndewilalagha wisaamghusha mndumu.

¹⁷Wuwiwi ni vindo vawo, na kutumia ndighi ni kunywa kwawo.

¹⁸Ela chia ya wahachi ni sa mwengere ghwa ndoe kuela; ghuchuriagha kung'ala-ng'ala hata dime ivike.

¹⁹Chia ya wawiwi ni sa kira cha ndindi; ndewimanyagha niki chawikuwisha.

²⁰Mwana wapo, sikiria malagho ghapo; degha kudu kwa madedo ghapo.

²¹Kuseghisighe ghikilaghaya; kughiwike ngolonyi kwako.

²²Ghadaneka irangi kwa uo ose ughiwonagha, na wubanana ghwa mumbi ghwake ghose.

²³Lindia ngolo yako kuchumba vilambo vose, angu aho niko ndoria ya irangi ifumagha.

²⁴Kusedede madedo ghangi ghiseboie; kukuwike kula na madedo gha tee.

²⁵Meso ghako ghizighaneghe kiimbiri; kodezighanagha kiimbiri.

²⁶Kukulindie seji kughendagha, na chia rako rose richakaia ra loli.

²⁷Tana na wuwiwi, kughende nicha, kuseghende mlambo ghumweri kula na chia ya hachi.