Read TAITA BIBLE – Biblia Ilagho Jiboie Kwa Wandu Wose MAKATANISHO 8 Bible Online

MAKATANISHO 8 - TAITA BIBLE – Biblia Ilagho Jiboie Kwa Wandu Wose bible

MAKATANISHO 8

¹Hikima waawuyawanga, na kutambukilwa waawuyawusira lwaka lwake mghondinyi koighu.

²Waawuyakaia kimusi andu kuko ighu; mbai na mbai ya chia ra matano.

³Waawuyawangia mbai na mbai ya mbenge ra muzi, andu kongiria:

⁴“Naawuyammbanga inyo wandu; naawuyaghora nenyo wadamu.

⁵Ee wandu msemanyagha, mkufundishe suku.

⁶Sikirienyi, nichadeda malagho mabaa, na kwa momu ghwapo nichaghora malagho gha hachi.

⁷Nichaghora loli; kudeda wuwiwi kwadanizamia tiki.

⁸Malagho ghose nidedagha ni gha hachi, ndeghina mikalo ingi hata ndeghilaghashagha.

⁹Ni malagho ghieliagha putu kwa mundu utambukilwagha; ni gha hachi kwa mundu umanyagha.

¹⁰Saghua mafundisho ghapo, wulalo ghwa feza; na kumanya, wulalo ghwa dhahabu ieleshero.

¹¹“Ini ne Hikima, nachumba lulu; ndekuwadie kindo chingi kuchikundagha chidimagha kufwananishwa nani.

¹²Ini ne Hikima, nani nawadie suku. Neko na kumanya na akili ndicha.

¹³Kuobua kwa BWANA ni kuzamilwa ni wuwiwi, Nadazamilwa ni kukuduka na kukukasa, na chia mbiwi na kudeda kisha.

¹⁴Nawadie njama na hikima ndicha; nawadie suku, sena neko na ndighi.

¹⁵Ni ini niwitesiagha wazuri kubonya nguma, na wabonyi nguma kudunga sharia ra hachi.

¹⁶Kwa wutesia ghwapo, wabaa na awo wandu wa ishima wadabonya nguma kwa hachi ndoenyi kose.

¹⁷Nadawikunda awo winikundagha, na awo winilolagha kwa kufunga ndighi wichaniwona.

¹⁸Mali na ishima vadakaia kwapo, mali redua na kuwona nicha.

¹⁹Icho kupatagha kwapo chachumba dhahabu ielie, chachumba feza ieleshero.

²⁰Nadaghenda na chia ra hachi; nadanugha mivori ya loli,

²¹ngiwifughisha awo winikundagha, na kuwineka mali kwa wungi.

²²“BWANA oreniumbieghe ukizoya kazi rake ra imbiri, imbiri ya kazi rake ra kala.

²³Ini nerebonyeroghe kufuma kokala, koimbiri wurumwengu ghuseumbilo.

²⁴Nerevaloghe imbiri bahari riseko, imbiri ndoria ra machi riseko.

²⁵Nerevaloghe imbiri mighondi mibaa isebonyero, imbiri mighondi mitini isebonyero.

²⁶Nerevaloghe imbiri ndoenyi na milamba yaro isebonyero, hata teri ingi isebonyero.

²⁷Iji orewikagha mlungunyi nerekoghe aeni, iji orewikagha mstari kutuonyi kwa bahari,

²⁸iji oremangishagha mawingunyi aighu, na kuwika ndoria ra machi gha bahari,

²⁹iji orewikagha mwano ghwa bahari, eri machi gharo ghisechumbe andu kwaro, iji orebonyagha msingi ghwa ndoenyi.

³⁰Nerekwanyeghe nao sa fundi wa kazi; nani nerekoghe kuboilwa kwake matuku ghose; ngiboilwa kukanya nao tuli tuli.

³¹Nerekoghe ngiboilwa ni wurumwengu ghose; ngiboilwa ni wadamu.

³²“Idana wana wapo, nisikirenyi. Warasimilwa awa wibonyagha seji nighoragha.

³³Sikirenyi mafundisho ghapo, mkaie na hikima, hata msakeghilegha.

³⁴Warasimilwa uhu unisikiriagha, ukicheresha mbengenyi kwapo, na kuwesera minyangonyi kwapo.

³⁵Mundu ukaniwona waawona irangi, na BWANA uchaboilwa nao.

³⁶Ela mundu ukanisowa, uakuvavira moni; wose wizamilwagha ni ini, weekunda kufwa.”