Read TAITA BIBLE – Biblia Ilagho Jiboie Kwa Wandu Wose MAKATANISHO 9 Bible Online

MAKATANISHO 9 - TAITA BIBLE – Biblia Ilagho Jiboie Kwa Wandu Wose bible

MAKATANISHO 9

¹Hikima waaghie nyumba yake, ukaidungia nguro rake mfungade.

²Wabwaghie nyamandu rake; waboisire divei yake, na kupanga meza yake.

³Wadumie wai wake wa kazi, wiwange cha mzinyi kufuma andu kuko ighu:

⁴“Awandu msewadie kumanya choonyi aha!” Na kwa mundu usewadie akili waghamba,

⁵“Choo kuje vindo vapo; kunyo divei naiboisa.

⁶Sighana na wandu wisewadie kumanya kukaie moyo. Nugha chia ya kumanya.”

⁷Uo ummbonyeragha makosa mundu umenyere wadakuredia madukano moni, na uhu umkemiagha mundu mmbiwi uchavavirika.

⁸Kusakemkemia mundu umenyere uchezamilwa ni oho; mkemie mundu wa hikima, nao uchakukunda.

⁹Mfundishe mundu wa hikima, nao uchachurikia hikima.

¹⁰Kuobua kwa BWANA niko kuzoya kwaro hikima, na kummanya Uo Mweli ni kukaia na suku.

¹¹Kwa chia yapo matuku ghako ghichakaia mengi, na miaka ya irangi jako ichachurikia.

¹²Kukakaia na hikima, ni kwa fwaida yako kumoni; kukamenya, ni kwa hasara yako kumoni.

¹³Muka mkelu, wadasongoda-songoda; wachue bea usena waya.

¹⁴Wadasea kidombo mnyangonyi ghwa nyumba yake, sena wadasea kidombo andu kuko ighu kwa muzi m'baa,

¹⁵ukiwanga wandu wiidagha, awo wiidagha na kazi rawo:

¹⁶“Awandu msewadie kumanya choonyi aha!” Na kwa mundu usewadie akili waghamba,

¹⁷“Machi gheiwa ghasingie, na vindo viiwilo na kujighwa kivisonyi vasingie.”

¹⁸Ela wandu waro ndewimanyagha kukaia wikangia nyumbenyi kwake wiafwa; waghenyi wake wingirie aho, weeka konndonyi Andu kwa Wafu.