Read TAITA BIBLE – Biblia Ilagho Jiboie Kwa Wandu Wose MCHILI 1 Bible Online

MCHILI 1 - TAITA BIBLE – Biblia Ilagho Jiboie Kwa Wandu Wose bible

MCHILI 1

¹Agha ni malagho gha Mchili, mwana wa Daudi, mzuri andenyi ya Jerusalemu.

²Mchili waghamba, Ni duu! Ni duu! Maza rose ni duu.

³Mundu wapatagha fwaidaki kwa kazi rose wawuyaribonya ndoenyi?

⁴Kivalwa chadaacha na kuida, ela wurumwengu ghwadakaia wokoni matuku ghose.

⁵Iruwa jadabuka na kuneng'ena, jashashira kuwuya sena andu jibukiagha.

⁶Mbeo yadaweta cha kusinyi, na kughaluka cha kaskazinyi; yadamara-mara ikinugha chia rake, na kuwuya andu izoiagha.

⁷Meda yose yadangia baharinyi, ela bahari ndeichuagha. Machi ghadawuya na kuzoya andu koni moda ghorebukiagha.

⁸Maza rose radareda kusilwa ni ndighi, hata nderighorekagha. Iriso jikeduawona ndejikatwagha, na kudu kukeduasikira, ndekuchuagha.

⁹Ijo jerekoghe jichakaia sena, na ijo jibonyero jichabonywa sena, hata ndekuwadie ilagho jingi iwishi wurumwengunyi kose.

¹⁰Jeko ilagho jingi mndungi udimagha kughamba, “Wona! Ilagho jimu iwishi heji.” Maza rose ramerie kukaia, imbiri hata isi disevalo.

¹¹Mndungi ndekumbukagha maza riidie, na mndungi ndechaakumbuka maza richaabonyeka.

¹²Ini Mchili, nerekoghe mzuri wa Israeli Jerusalemu.

¹³Nerekufunyireghe kukufundisha na kuvumbua maza rose rawuyabonyeka wurumwengunyi; ngawona kukaia Mlungu wanekie wadamu kubonya kazi ilemere loli loli.

¹⁴Nawonie maza rose rawuyabonywa wurumwengunyi; ela rose ni duu; ni sa kulwa na mbeo.

¹⁵Icho chikomekie ndechidimagha kughorolwa, na icho chiseko ndechidimagha kutalwa.

¹⁶Ngaghamba ngolonyi kwapo, “Nawurie mundu m'baa, uko na hikima mbaa kuchumba wandu wose werebonyereghe nguma Jerusalemu imbiri yapo. Namanyire hikima na kumanya seji riko.”

¹⁷Ngatumia akili rapo ngikunda kumanya hikima niki, na isu na wukelu niki. Ngawona uku nako ni sa kulwa na mbeo.

¹⁸Hikima mbaa yadareda kusumbuka, na kumanya kubaa kwadareda wasi.