Read TAITA BIBLE – Biblia Ilagho Jiboie Kwa Wandu Wose MCHILI 10 Bible Online

MCHILI 10 - TAITA BIBLE – Biblia Ilagho Jiboie Kwa Wandu Wose bible

MCHILI 10

¹Izi rifue radabonya marumba ghiboie ghinuke kiwiwi, wokoni na wukelu mtini ghwadainja hikima na ishima.

²Mundu wa hikima kwa kawaida wadabonya agho ghiko mecha, na mkelu kubonya mawiwi.

³Mkelu ukakaghenda achienyi ndekaiagha na akili, wadakuwonyera kwa kula mundu kukaia ni mkelu.

⁴M'bonyi nguma ukakubonyera machu, kusakesigha kazi yako; kunyama kima kwadima kughalua malagho.

⁵Nawonie wuwiwi ghumu ghukibonywa ni wabonyi nguma wurumwengunyi,

⁶wakelu wineko kazi ra ighu, na wazuri wa mali wineko kazi ra ndonyi.

⁷Nawonie wazumba wikighenda na farasi, na wazuri wikighenda na maghu sa wazumba.

⁸Uo ukotagha kina, uchachunukia andenyi yaro moni, na uo uvuchuagha wurigha, uchalumwa ni choka.

⁹Uo ukotagha magho, ghichamshoghonua, na uo ubaragha mbande wadakuwika ndengonyi.

¹⁰Kukalemwa ni kunoa isoka jako, kuchatumia ndighi nyingi kudema najo; ela kukakaia na hikima kuchajinoa kiimbiri.

¹¹Choka ikaluma imbiri iserumilo, mrighiti ndechaakaia na fwaida ingi.

¹²Mundu wa hikima ukadeda malagho, ghadamredia ishima; ela madedo gha mkelu, ghadamnona moni.

¹³Wadazoya kudeda malagho gha wukelu, na kutuonyi kwa malagho ghake kwadareda wuwiwi ghwa isu.

¹⁴Mkelu oochulwa ni malagho, ndekuwadie mndungi umanyagha agho ghichagha; nani udimagha kumghoria agho ghichaampata nyuma ya kifwa chake?

¹⁵Kazi ra mkelu radamsirisha ndighi, hata ulaghalo ni chia eghenda mzinyi.

¹⁶Ni bugha kwa isanga jiko na mzuri uko mwana, na wabaa waro wibonyeghee karamu kio chee?

¹⁷Jarasimilwa isanga jiko na mzuri udumbuagha malagho kwa hachi, na vilongozi wijagha kwa ngelo yaro; wikumaziriagha weni wisewongiagha.

¹⁸Mundu ukakaia mghadi, nyumba yake yadaanya na kuchika.

¹⁹Karamu yadaredia wandu maboilo, na divei yadasekesha wandu, ela pesa niyo ikatishagha maza rose.

²⁰Kusemsholie mzuri hata kwa maririkanyo ghako, hata kusemmenye mzuri wa mali kukikaia chumbenyi kwako; nyonyi yadima kudwa malagho ghako, iendewighoria.