Read TAITA BIBLE – Biblia Ilagho Jiboie Kwa Wandu Wose MCHILI 6 Bible Online

MCHILI 6 - TAITA BIBLE – Biblia Ilagho Jiboie Kwa Wandu Wose bible

MCHILI 6

¹Nawonie wuwiwi ghumu wurumwengunyi ghwawuyawisumbua wadamu nandighi.

²Mundu wanekwa mali ni Mlungu, na vilambo na ishima, nao ndesowagha kilambo chingi uchikunde. Ela sena Mlungu umuime wulalo ghovitumia, na wulalo ghwaro mghenyi uvitumie. Iri naro ni maza ra duu; ni wuwiwi ghuchumbie.

³Mundu wadima kukaia moyo matuku mengi na kuva wana ighana; ikakaia usepatire maboilo ghangi iranginyi kwake, na kurikwa nicha, ini niaghamba mwana ufushiro ni baa kuchumba uo.

⁴Uo mwana ndewonekagha angu icho kifu kukaia kilambo chingi; warikwa usenekelo irina.

⁵Hata ngera uja mwana jingi ndewonie mwengere, angu kumanya ilagho jingi, oko na kuhora kuchumba uja mundu.

⁶Hata ngera wakaie moyo miaka elfu iwi, ndemchumbie uo mwana ufushiro; Kukakoni nechi wandu wose waawuyaghenda andu kumweri.

⁷Mundu wadabonya kazi rose eri upate vindo, ela ndekatwagha.

⁸Mundu wa hikima wawuyapata fwaidaki kumchumba mkelu? Mkiwa upata fwaidaki kumanya seji imfwane ukaie moyo?

⁹Ni baa kukatwa ni icho kuko nacho kuchumba kukaia na bea ya vilambo kuseviwonagha. Ni sa kuwingisa mbeo.

¹⁰Kula kindo chibonyekagha chapangilo kufuma kala; nesi daichi mdamu ndedimagha kusimana na uo umchumbie ndighi.

¹¹Malagho mengi ghadalaghasha maana; da kukakoni ghimredia mundu fwaidaki?

¹²Mundu umanya wada icho chimfwanagha mdamu kuchumba andenyi ya irangi jake ivui ja duu, jiidagha sa kirerendi? Mundu udima wada kumanya icho chichaakaia wurumwengunyi nyuma ya kufwa kwake?