Read TAITA BIBLE – Biblia Ilagho Jiboie Kwa Wandu Wose ISAYA 1 Bible Online

ISAYA 1 - TAITA BIBLE – Biblia Ilagho Jiboie Kwa Wandu Wose bible

ISAYA 1

¹Mawono gha Isaya mwana wa Amozi, oreghiwonieghe kwa wundu ghwa Juda na Jerusalemu; matuku gha Uzia, Jothamu, Ahazi, na Hezekia wazuri wa Juda.

²Sikirenyi, ee mlungunyi, kudeghe kudu, ee ndoenyi, angu BWANA waghamba, “Nalelie wana wikazoghua, ela wanilegha.

³Ng'ombe yamuichi ndee wake, na punda waichi kiwanda cha bwana wake, ela Israeli ndeichi, wandu wapo ndewiwuetambukilwa.”

⁴To! E mbari ya kaung'a, wandu wilemerwagha ni wuwiwi; mavalo gha wabonyi kiwiwi wana wibonyagha laghe-laghe. Wamsighie BWANA, wammenyere Mlungu, Mweli wa Israeli, watane nao na kuwuya nyuma putu.

⁵Kwaki mduagha mkilegha kusikira na kukunda kukabwa ee Israeli? Chongo chako chose ni mkongo, na ngolo yako yose yaawuyadumbuka.

⁶Kufuma lwau lwako hata chongo, ndekuwadie wubanana ghungi; ela ni kuvonoka na vonda, na ngoru riruchagha; ndevioghoshero hata kufungwa, hata ndevishingilo mavuda anduangi.

⁷Isanga jenyu jasighwa iduu, mizi yenyu yakorwa; waghenyi waja isanga jenyu mkizighanira; jeesighwa iduu seji jeenonwa ni waghenyi.

⁸Muzi ghwa Jerusalemu ghoosighwa sa kiwanda chiko mbuwenyi ya mizabibu; sa kigharo aghadi ya mbuwa ya marenge; sa muzi ghurughailo ni waghenyi.

⁹Ngera BWANA wa majeshi nderedisighieghe masighariko gha wandu wikirie, Kumangu deeka sa Sodoma, kumangu dawurie sa Gomora.

¹⁰Sikirenyi lwaka lwa BWANA, inyo wabonyi nguma wa Sodoma; deghenyi madu msikire mafundisho gha Mlungu odu, inyo wandu wa Gomora.

¹¹BWANA waghamba, “Uko kunifunyira vizongona vingi ni kilamboki kwapo? Nakojere vizongona vekora va bauru; na mavuda gha nyamandu ribandie. Siboilwagha ni bagha ra njau, angu wana wa ng'ondi na fwandi.

¹²“Iji mwacha imbiri kwapo kunitasa, nani orejilawirieghe ilagho ijo hata muche kuwadia waza rapo?

¹³Mseche kufunya vizongona va duu sena, marumba kwapo ini ni wuchafu. Kutasa kwa Ndima ra Mori Lukombe, na Sabato, na kuwanga makwanyiko. Sidimagha kurumaghia mawiwi ghenyu, na makwanyiko ghenyu ghetasa.

¹⁴Roho yapo yadazamilwa ni kutasa konyu kwa Ndima ra Mori Lukombe na Sabato, ranilemeria nandighi sidimagha kuriduka.

¹⁵Mkaghorua mikonu yenyu kunilomba, sichaamzighana; hata mkalomba malombi mengi, sichaaghisikira anduangi; kwa kukaia mikonu yenyu eechua bagha.

¹⁶Kuoghoshenyi mmbeni, mkaie muelie; sighenyi kubonya mawiwi imbiri kwapo; lekenyi kubonya makosa.

¹⁷Mkufundishe kubonya mecha, muilole hachi; witesienyi awo wawuyawonelwa, mnekenyi mwana usewadie ndee hachi yake, mdederienyi muka-mkiwa.”

¹⁸BWANA waghora, “Choonyi idana dibonye njama; hata ngera kaung'a renyu ratinikie, richakaia ra chokwa sa theluji; hata ngera reeka ra ngundu sa bagha, richakaia ra chokwa sa pamba.

¹⁹Mkarumiria na kunisikira, mchaja mecha gha isanga;

²⁰ela mkalegha kusikira putu, mchatoteshwa kwa lufu, angu ini BWANA naghora ilagho iji.”

²¹Yakaie wada muzi ghorekoghe mloli, kuwuya sa ilaya; ugho ghorechuloghe ni loli! Hachi erekoghe andenyi kwake, ela idana ghwachulwa ni wabwaghi.

²²Feza yako yawurie ya duu, divei yako eeranganywa na machi.

²³Wabaa waro wawuya waleghi, wakaia wangara wa vitoi. Kula umu onyu ookunda kuhongwa, na kuwusa manosi; ndewidederiagha wana wakiwa, hata ndewimtanyiagha hachi muka mkiwa anduangi.

²⁴Kwa huwo BWANA, uo BWANA wa majeshi, Uo-Uwadie-Ndighi wa Israeli waghamba: “Aa! Nichawonyera machu ghapo aighu yenyu inyo wamaiza wapo, na kulipa kisasi aighu yenyu inyo watangali wapo.

²⁵Nichammbwada kwa mkonu ghwapo, na kumuoghosha sa chuma; nichamuelesha seji chuma chieleshwagha kwa modo; na kuinja wuwiwi ghonyu ghose.

²⁶Nichawika watanyi wako sa iji koni werekoghe imbiri; na wanjama wako sa iji koni werekoghe; niko kuchawangwa muzi ghwa hachi na muzi ghwa loli ee Jerusalemu.”

²⁷Jerusalemu ichakombolwa kwa hachi, na awo wose wiheagha andenyi yaro wichakombolwa ni BWANA loli.

²⁸Ela Mlungu uchawitotesha waleghi na wakaung'a; uchawisaghisa wose wimsighagha BWANA.

²⁹Mchafwa waya kwa wundu ghwa kutasa mialoni, mchafwa waya kwa kuwika mbuwa renyu wakfu kwa wundu ghwa milimu.

³⁰Kwa kukaia mchakaia sa mualoni ghuomagha malemba, kara kara na mbuwa isewadie machi.

³¹Mundu uwadie ndighi uchakaia sa itasa na kazi rake sa sisia ra modo, uchahianya na kazi rake hata mndungi usedime kumrimisha.