Read TAITA BIBLE – Biblia Ilagho Jiboie Kwa Wandu Wose ISAYA 17 Bible Online

ISAYA 17 - TAITA BIBLE – Biblia Ilagho Jiboie Kwa Wandu Wose bible

ISAYA 17

¹Agha nigho malagho aighu ya Dameshki. “Dameshki ndeichaakaia muzi sena, ela ghuchawuya maghacho.

²Mizi ya Siria ichasighwa putu, nayo ichawuya andu kolishira ng'ombe na ng'ondi; richadima na mndungi ndechaariturusa anduangi.

³Ngome ya Israeli ichainjwa na wuzuri ghwa Dameshki ghuchasia, na masighariko gha wandu wa Siria wichasowelwa ishima sa wandu wa Israeli, ini BWANA wa majeshi naghamba.”

⁴BWANA ukaghamba, “Ngelo ichacha na wubaa ghwa Israeli ghuchasia, na wuzuri ghwake ghwa mali ghuchawuya wukiwa.

⁵Israeli ichawuya sa mbuwa ikuwidiro, sa mbuwa ikuwidiro na kusighwa duu aja vololo ya Refaimu.

⁶Wichasigharika wandu watini, na Israeli uchafwanana na mzeituni ghuwailo ndembe rake rikasigharika iwi idadu tu changalamdo, angu inya isanu huwu mbashunyi ra nandonyi, ini BWANA, uo Mlungu wa Israeli naghamba.”

⁷Ngelo iyo, wandu wichammanya Muumbi wawo na meso ghawo ghichamzighana Mlungu Mweli wa Israeli.

⁸Ndewichaatala madhabahu wereribonyereghe, hata ndewichaakaia na irumirio kwa kazi ra mikonu yawo, hata ndewichaarizighana kazi wereribonyereghe, iyo milimu ya Ashera, mlungu ghwa waka, na madhabahu refukira marumba.

⁹Ngelo iyo, mizi yawo imange ichawuya sa maghacho gha Wahivi na Waamori ghisighilo nyuma ya kunonwa, wikiwikimbia wandu wa Israeli, nayo ichasighwa miduu.

¹⁰Kwa kukaia oho Israeli kwamerie kumliwa Mlungu uo ukukiragha, hata ndekuikumbukie Mbanga yako ekimbiria. Kwa huwo, hata ngera kwawa miwalwa ighokie, na kuiwika kwa wundu ghwa milungu ya kighenyi,

¹¹hata mkaibonya izoghuo ijo ituku jeni muiwae, na kufunya mboi nakesho yaro, ndemchaapata makuwido ghangi; mchakaia wandu wa wasi, na luwawo lusesiagha.

¹²Sikirenyi chwaka ra wandu wa mbari nyingi, rikiruruma sa kuruma kwa bahari; ni kururuma kwa iro mbari ra wandu sa kughona kwa machi mengi.

¹³Iro mbari ra wandu raruruma sa kughona kwa machi mengi, ela Mlungu uchawikemia, nawo wichakimbia; wichawingwa sa mafozi ghidukwagha ni mbeo aighu mghondinyi, sa teri ya kikulughulu na kiremba.

¹⁴Nakenyi wiaobosha, ela nakesho ndewiko anduangi. Ijo nijo ifungu ja wandu wididwagha wunyika, awo widisokagha mali redu.