Read TAITA BIBLE – Biblia Ilagho Jiboie Kwa Wandu Wose ISAYA 20 Bible Online

ISAYA 20 - TAITA BIBLE – Biblia Ilagho Jiboie Kwa Wandu Wose bible

ISAYA 20

¹Iji m'baa wa majeshi gha Ashuru oredumiloghe ni mzuri Sargoni wa Waashuru, upate kuwikaba Wafilisti, orekabieghe muzi ghwawo ghwa Ashdodi ukawisima.

²Ngelo iyo, BWANA oreghorieghe na Isaya mwana wa Amozi ukighamba, “Ghenda kuinje iyo nguwo ya igunia iko kiwonunyi kwako na vadu viko maghunyi kwako.” Isaya ukasikira, ukaghenda duu sena usena vadu maghunyi kwake.

³BWANA ukaghamba, “Sa iji mdumiki wapo Isaya waghenda duu, na maghu maduu, kwa miaka idadu kukaia alama na mashiniko aighu ya Misri na Ethiopia;

⁴niko koni mzuri wa Waashuru uchaawidwa Wamisri na Waethiopia wubarishonyi watini na wabaa wiko duu na maghu maduu, mashimba ghawo ghikiwoneka; Wamisri wipate kufushwa waya.

⁵Niko wandu wichafwa waya na kushinika kwa wundu ghwa Ethiopia isuwirio jawo, na Misri wikukasire nawo.

⁶Na wandu wikaiagha pwani ya Filistia wichaghora ituku jija, ‘Wonenyi agha ghawipata wandu derewisuwirieghe na awo derekimbirieghe cha kwawo wipate kuditesia na kudikira na mzuri wa Waashuru! Da isi dikia wada?’”