Read TAITA BIBLE – Biblia Ilagho Jiboie Kwa Wandu Wose ISAYA 22 Bible Online

ISAYA 22 - TAITA BIBLE – Biblia Ilagho Jiboie Kwa Wandu Wose bible

ISAYA 22

¹Agha ni malagho aighu ya Vololo ya Mawono. Kutambua kwaro niki inyo mmbose kujoka aighu nyumbenyi mwambori?

²Kwaki mkemagha inyo muzi ghwa ndoghoi mukukasire? Wandu wenyu ndewibwaghilo kwa lufu hata kufwa wudenyi anduangi.

³Wabonyi nguma wenyu wose wakimbia chiaimweri; wawadwa wisekumbie hata iwanu. Na wose werekuloghe, werewadiloghe; hata ngera werekimbirieghe kula.

⁴Niko ngaghamba, “Nileke! Nisighe nilile kwa kuwawa, hata kusesumbuke kuninyamirisha, angu nawawa ni uko kunoneka kwa wandu wapo.”

⁵Kwa kukaia ituku ja BWANA Mlungu wa majeshi jameria kuvika; ituku ja ndoghoi na matiriro ghewadilwa-wadilwa, na kuvurughwa akili andenyi ya Vololo ya Mawono. Mawurigha gha muzi ghodu ghameria kughushwa andoenyi, na chwaka ra wandu wikemagha cha mighondinyi rasikirika.

⁶Majeshi ghafuma Elamu ghameria kucha wiko na ndana na mawanu, wajoka magare na farasi; na Kiri wawada ngao.

⁷Vololo righokie ra Juda rachulwa ni magare, na wajoki farasi wakaia kimusi mbengenyi ya Jerusalemu.

⁸BWANA wameria kuinja wulindiri ghose ghwa Juda. Ngelo iyo, modeeka mkisuwiria maswagha ghenyu gherekoghe andenyi ya Ngome ya Msidu.

⁹Mwendawona kukaia muzi ghwa Daudi ghoko na chughuma nyingi, moreserieghe kudaya machi kiriwa cha isi;

¹⁰mkarilawua nyumba ra Jerusalemu na kurivuchua, mpate magho gheboisa wurigha ghwa muzi.

¹¹Nenyo moreaghieghe kisima ghadi na ghadi ya agho mawurigha, kwa wundu ghwa agho machi gha kiriwa cha kala; ela ndemoremzighanireghe hata kumtala Mlungu uo orevibonyereghe mpango kufuma kala.

¹²Ngelo iyo, Bwana MLUNGU wa majeshi orekoghe ukimmbanga mpate kulila na kukema, na kuara vongo venyu kwa wasi, mkirwa nguwo ra magunia.

¹³Ela wulalo ghwaro morekoghe na iseko na kuboilwa, mkibwagha njau na ng'ondi na kuja nyama na kunywa divei mkighamba, “Ndedije na kunywa angu kesho diafwa.”

¹⁴BWANA wa majeshi wanizerie, “Mawiwi agha ndeghichaafuilwa wughoma hata mwafwa; ini Bwana MLUNGU wa majeshi naghamba.”

¹⁵Bwana MLUNGU wa majeshi wanizerie nighende kwa Shebna uja mlindiri wa kinyumba cha mzuri kumzere,

¹⁶“Niki kubonyagha aha, na nani ukurumirie kukukotere kaburi kumoni ighonyi aighu mghondinyi?

¹⁷Ola BWANA uchakuwada na kukuda kula ee mundu kuwadie ndighi. Uchakumaziria,

¹⁸nao uchakumarisha-marisha na kukuda noko cha isanga ja kula sa mpira, na oho kuchafuya aho, na magare ghako korekukasireghe nagho ghichasigharika aho; oho kumfushire bwana wako waya andenyi ya nyumba yake.

¹⁹BWANA uchakusera kufuma ofisinyi kwako na kukuwika andu kwa ndonyi.”

²⁰BWANA ukamzera Shebna, “Ngelo iyo nichammbanga mdumiki wapo Eliakimu mwana wa Hilkia;

²¹nani nichamrusha nguwo rako ra wadumiki na kumfunga mkowa ghwako; nichamneka madaraka ghako, nao uchakaia m'baa wa wandu wikaiagha Jerusalemu na wandu wa Juda.

²²Nani nichamneka mfunguo ghwa nguma ya nyumba ya Daudi; ucharughua na mndungi ndechaarugha, ucharugha na mndungi ndechaarughua.

²³Nichammangisha gi kara kara na kikosi chakomerelwa andu kwaro, nao uchawuya asili ya ishima ja kiwuzuri andenyi ya nyumba ya ndee.

²⁴“Kichuku chake chose wichakusaghika nao, na kukaia wulemeri m'baa kwake, kwa kukaia wichammbikiria maza rose sa nyungu na bakuli rawanikwa kikosinyi.

²⁵Ngelo iyo, icho kikosi cherekomereloghe chichasughusika na kukuka, na ugho wulemeri ghose ghorekoghe aighu yaro ghuchainjwa angu ini BWANA naghamba.”