Read TAITA BIBLE – Biblia Ilagho Jiboie Kwa Wandu Wose ISAYA 27 Bible Online

ISAYA 27 - TAITA BIBLE – Biblia Ilagho Jiboie Kwa Wandu Wose bible

ISAYA 27

¹Ngelo iyo, BWANA uchamkaba Leviathani, iyo choka ikimbiagha, kwa lufu lwake lukurie, lubaa, sena luwadie ndighi; uchamkaba Leviathani, iyo choka ighalaaghala, na kuibwagha iyo choka mbaa ikaiagha baharinyi.

²Ngelo iyo, BWANA uchaghora aighu ya mzabibu ghwake:

³“Ini BWANA, nuo mlindiri waro; nadaghudunga machi kula ngelo. Nadaghulindia kio na dime eri mndungi useghubonye ilagho jingi.

⁴Siwadie machu ghangi na mbuwa ya mizabibu. Ngera edeeka na minjwa na mtaranganga elwa nayo, kumangu nadaalwa nayo, na kuikora yose.

⁵Ikakaia wamaiza wa wandu wapo wikunde wulindiri ghwapo, ndewiche wibonye sere na ini, ee wibonye sere na ini.”

⁶Matuku ghichagha, kivalwa cha Jakobo chichamanga, wandu wa Israeli wichawona nicha na kubara mbashu, hata wurumwengu ghose ghuchulo ni matunda ghake.

⁷Kwani Mlungu wakabie Israeli seji ukabie iro mbari rerewikabieghe? Angu wabwaghie Israeli seji ubwaghie awo werewibwaghieghe?

⁸Kipimo kwa kipimo, korelueghe nawo na kuwighenja wubarishonyi. Korewiinjireghe kwa makabo ghibirie, sa kwa kiremba chenona cha mashariki.

⁹Kwa huwo, kaung'a ya wandu wa Israeli ichainjwa kwa chia iyo, na agha ghichakaia ni matunda gha kuinjirwa kaung'a yake iji magho gha milungu ya kighenyi ghainjwa na kusheghwa sa chokaa, na iji madhabahu ra mlungu ghwa waka Ashera, na iro refukira marumba rameria kuinjwa.

¹⁰Muzi ghorekoghe na ngome ghwasighwa mduu, wandu waghukimbirie ghukasighwa sa kireti; aho niko ng'ombe rilishwagha, radadima aho na kukonua mbashu ra midi yaro.

¹¹Midi yaro ikaoma, yachika na waka wacha na kuishoa mbande na kurikora. Wandu awa ndewitambukilwagha; kwa huwo Muumbi wawo ndechaawifuya wughoma hata ndechaawibonyera wudawirio ghungi anduangi.

¹²Ngelo iyo, BWANA uchachana na kuela wandu wake sa ngano, kufuma Moda ghwa Eufrate hata kamoda ka Misri; nenyo mchakwanywa umweri umweri, ee wandu wa Israeli.

¹³Na ngelo iyo tarumbeta mbaa ichakabwa, na awo werelagharieghe isanga ja Ashuru, na awo werewingiloghe cha isanga ja Misri, wichacha kumtasa BWANA aighu ya mghondi ghuelie Jerusalemu.