Read TAITA BIBLE – Biblia Ilagho Jiboie Kwa Wandu Wose ISAYA 29 Bible Online

ISAYA 29 - TAITA BIBLE – Biblia Ilagho Jiboie Kwa Wandu Wose bible

ISAYA 29

¹Ni bugha kwako Jerusalemu,[10] ugho muzi Daudi orebonyereghe kambi yake. Miaka ndeiche na kuida karamu rikibonywa;

²ela Mlungu ucharedia muzi ghwa Jerusalemu wasi; muzi ughoni ghuwangwagha “Madhabahu ya Mlungu;” kuchakaia na kililo na kukema mchungu, na muzi ghose ghuchakaia sa madhabahu yachulwa ni bagha.

³Na Mlungu uchaghurughaia ugho muzi; uchaagha ngome na minara minara, elwa nagho.

⁴Lwaka lwa Jerusalemu luchasikirika kondonyi ndoenyi; madedo ghake ghichasikirika kufuma terinyi; lwaka lwake luchasikirika sa lwaka lwa kisuka, lukihohoria kufuma terinyi.

⁵Izungu ja wamaiza wako jichasaghiswa sa teri, na majeshi ghing'etere ghichakimbia; wichakaia kara kara na makozi ghawusirwa ni kikulughulu. Na shwa wori,

⁶kuchachelwa ni BWANA wa majeshi, kukuvuvua kwa lukuwa na msughusiko ghwa ndoe; na lwaka lubaa, na kikulughulu na kiremba; na lumu lwa modo lukoragha.

⁷Niko aho izungu ja majeshi gha iro mbari rawuyalwa na Jerusalemu, wose wichalaghaya kara kara na ndodo, ee, sa agho mawono gha nakio.

⁸Wichakaia sa iji koni mundu uko njala ulodagha wei waawuyaja, ela ukawuka uchakua njala yake iko wokoni. Uchakaia karakara na mundu uko kau ulodagha wei waawuyanywa machi, ela ukawuka uchakua ooka kau wokoni. Huwo niko iro mbari rilwagha na Mghondi ghwa Sioni richaakaia.

⁹Kubonyenyi mmbeni kukaia wakelu, nenyo mmbuye wakelu. Kubonyenyi mmbeni kukaia vitungure, nenyo mmbuye vitungure. Mmbongie ela si kwa divei, tatarikenyi ela si kwa chofi ibirie.

¹⁰Kwa kukaia BWANA wamerie kudia aighu konyu roho ya dilo nyingi, nao wamerie kughitungurisha meso ghenyu inyo walodi msewone, na kufinikira vongo venyu inyo wawoni.

¹¹Mafunuo ghose gha wulodi ghamerie kuviswa konyu, karakara na chuo chikabilo mhuri. Mndungi uichi kushoma ukanekwa chuo icho ukizerwa uchishome uchaghamba, “Sidimagha kuchishoma angu chikabilo mhuri.”

¹²Na mndungi useichi kushoma ukanekwa icho chuo uchishome uchaghamba “Sidimagha kushoma.”

¹³BWANA ukaghamba, “Kwa kukaia wandu awa wacha kunitasa kwa momu ghoni ingelo ngolo rawo riko kula na ini, kunitasa kwawo kwanughana na mizango na mawiko gha wadamu,

¹⁴huwo koni na ini nichawibonyera maza richaawishinua; malagho gha mashiniko ghisedimagha kuvikilwa ni hikima ya wandu wawo; na wandu wawo wa akili wichasirilwa ni kumanya kwawo.”

¹⁵Ni bugha kwa awo wimvisagha BWANA njama rawo, awo wiwikie mabonyo ghawo andenyi kivisonyi, na kukotia, “Nani udiwonagha? Na nani udimanyagha?”

¹⁶Awo wadaghalua malagho. Welee, mvimbi wadima kufwananishwa na wongo? Hata icho kilambo chibonyero chidime kumzera uo uchibonyere, “Si oho ungi kuniumbie?” angu kughamba, “Oho ndekumanyagha agho kughoragha?”

¹⁷Yasighwa ngelo vui na msidu ghwa Lebanoni ghuchaghaluswa ghuwuye mbuwa rinorie, na mbuwa rinorie riwue msidu.

¹⁸Ngelo iyo, mundu usesikiragha uchasikira malagho ghikishomwa, na awo wiko vitungure wikaiagha kirenyi, meso ghawo ghichafunguka wiwone.

¹⁹Wandu wikuserie wichapata maboilo kufuma kwa BWANA, na wakiwa wichamkasa Uo Mlungu wa Israeli kwa kuboilwa.

²⁰Uchawitotesha wang'eti, na awo wisekagha kwa lumenyo uchawinyamira, na wose wichereshagha kwa kubonya wuwiwi uchawiinja putu.

²¹Mlungu uchawitotesha awo wandu wiwighushagha wambao kwa kuwizighiria, awo wiwideghiagha shaghala wandu wikemiagha wuwiwi; uchawitotesha awo wandu wiwilaghashagha wandu wa loli na malagho maduu.

²²Kwa huwo BWANA uo oremkombueghe Abrahamu waghora huwu aighu ya wandu wa Israeli: “Israeli ndeechaafushwa waya hata kughaluka wushu ghwake anduangi.

²³Kwa kukaia ngelo uchaawiwona wana wake aghadi yake, nawo ni kazi ya mikonu yapo, niko wichaajielesha irina japo, wimkase Mlungu, Mweli wa Israeli, na kumshinikia Uo Mlungu wa Israeli.

²⁴Awo wikosagha rohonyi, wichapata kumanya, na awo wichulo ni mazughunuko, wicharumiria mafundisho.”